Dual PanelHatuahon ni Halak na Daulat
1Miktam. Humbani si Daud. Parorot Ham ma ahu Naibata, ai marlingod hu Bamu do ahu.
2Ningku do dompak Jahowa, “Ham do Tuhanku, seng dong na pasonangkon ahu sobali Ham.”
3Halak na ma pansing na i nagori on, marmulia do sidea, marosuh uhur hubani sidea.
4Buei do sitaronon ni halak sisombah na legan, tapi seng ra ahu dihut manggalangkon galangan daroh ni sidea ai, nai ma, gari goran ni sidea seng sobuton ni bibirhu.
5Jahowa do parbagianan bangku ampa panginumanku; Ham do sitotapkon parbagiananku.
6Tongon do tali sibar-sibar mangonai bangku bani ianan na madear, nai ma, dear tumang do parbagiananku.
7Pujionku do Jahowa, na mamodahi ahu, age borngin iajari piah-piahku do ahu.
8Tongtong do hubahen Jahowa i lobei ni matangku; anggo i siamunku Ia, seng anjai jurgang ahu.
9Halani ai malas do uhurhu anjaha marolob-olob tonduyhu, pamatangku pe marianan do bani na sonang.
10Ai seng anjai ondoskonon-Mu tonduyhu hu nagori toruh, anjaha seng paturuton-Mu halak na daulat Bamu mangidah hamarsikon.
11Sai patugahon-Mu do bangku dalan hagoluhan; gok do malas ni uhur i lobei ni bohi-Mu, anjaha hatuahon do i siamun-Mu sadokah ni dokahni.