Dual PanelHamuliaon ni Naibata, na Pinatalar ni Panompaon-Ni pakon Titah-Ni
1Bani pambobai koor. Psalm ni si Daud. (19-2) Haganup do langit mambaritahon hamuliaon ni Naibata, anjaha hajangkajang mangambilankon pambahenan ni tangan-Ni.
2(19-3) Ari na sada patugahkon ai bani ari na sada nari, borngin na sada padaskon ai bani borngin na sada nari;
3(19-4) seng marhasoman hata, seng marhasoman sahap, anjaha seng tarbogei sorani,
4(19-5) age sonai torus do sorani bani sab tanoh on anjaha sahapni das hu ujung ni dunia on. Ijai ipauli do lampolampo bani mata ni ari,
5(19-6) na mandarat humbani kamarni songon siparunjuk, anjaha na marolob-olob songon puanglima marayak sidalananni.
6(19-7) Poltak do ia humbani ujung ni langit na sada, anjaha mardalan das bani ujung ni na sada nari, aha pe lang na ponop humbani milasni.
7(19-8) Gokan dear do titah ni Jahowa, boi pahinsah uhur; sintong do hasaksian ni Jahowa; iparuhuri do na bulus uhur.
8(19-9) Pintor do titah ni Jahowa, boi pamalas uhur; pitah do titah ni Jahowa, ipalihar do pangidah.
9(19-10) Biar dompak Jahowa ai do na pansing, anjaha totap ronsi sadokah ni dokahni; aturan ni Jahowa ai do na sintong, anjaha pintor do haganupan.
10(19-11) Harganan do ai ase omas, ase buei omas na pinapitah, tobunan do ai ase manisan ni lobah, humbani tobu-tobu ni huramah.
11(19-12) Juakjuak-Mu pe dapotan sipasingat do marhitei ai; dapotan upah banggal do halak na mangkorjahon ai.
12(19-13) Hakahouon -- ise ma na mangartihon ai? Paluah Ham ma ahu humbani salah na ponop!
13(19-14) Ramotkon Ham ma juakjuak-Mu humbani gijang ni uhur, ase ulang irajai ahu, jadi seng be dong sihataon bangku, gabe borsih ma ahu humbani panlanggaron na banggal.
14(19-15) Sai harosuhkon Ham ma hata ni pamanganku ampa pamingkir-mingkirion ni uhurhu, Ham Jahowa, batar-batarhu ampa sipaluah ahu.