Tonggo Mangapiti Raja
1Bani pambobai koor. Psalm ni si Daud. (20-2) Sai ibalosi Jahowa ma ham bani panorang hasosakan, goran ni Naibata ni si Jakob ma manramotkon ham!
2(20-3) Sai itongos ma bamu pangurupion humbani ianan na ma pansing in, janah sai itungkol ma ham hun Sion.
3(20-4) Sai mardingat ma Ia bani galanganmu, anjaha sai iharosuhkon ma galangan situtungonmu. Sela.
4(20-5) Sai ibere ma hu bamu harosuh ni uhurmu, anjaha ipasaud ma sura-suramu,
5(20-6) ase marsurak-surak hanami halani hamonanganmu, anjaha manaikkon mandera mangunsagahkon goran ni Naibatanta; sai ipasaud Tuhan ma sagala pangindoanmu.
6(20-7) Sonari pe hubotoh, paboa sai ipamonang Jahowa do na mininakan-Ni, sai ibalosi do ia humbani surga-Ni na pansing in, marhitei haluahon, na binahen ni tangan siamun-Ni na gogoh in.
7(20-8) Ia sidea gareta pakon huda do iunsagahkon, tapi anggo hita goran ni Jahowa Naibatanta do pangajamanta.
8(20-9) Rebad do sidea anjaha mangkatompas, tapi anggo hita puho do use anjaha jongjong totap.
9(20-10) Ham Jahowa, urupi Ham ma raja in, balosi Ham ma hanami, sadihari dilo-dilo hanami Bamu.