Dual PanelDoding Tarima Kasih halani Hamonangan ni Raja
1Bani pambobai koor. Psalm ni si Daud. (21-2) Ham Jahowa, marmalas ni uhur do raja in halani hagogohon-Mu, anjaha marolob-olob tumang do ia mangidah haluahon na hun Bamu.
2(21-3) Ibere Ham do hubani pinindo ni uhurni, anjaha seng itulak Ham pangindoan ni bibirni. Sela.
3(21-4) Ai ialo-alo Ham do ia marhasoman pasu-pasu na banggal, igotongkon Ham do bani sortali omas.
4(21-5) Ipindo do hagoluhan hun Bamu; ibere Ham do hu bani umur na ganjang ronsi sadokah ni dokahni.
5(21-6) Timbul do hasangaponni halani pangurupion na hun Bamu, hatunggungon pakon hahormaton ibere Ham do hu bani.
6(21-7) Ibahen Ham do ia gabe pasu-pasu torus, ipasabou Ham do ia marhitei malas ni uhur ni bohi-Mu.
7(21-8) Ai martenger ni uhur bani Jahowa do raja in, anjaha halani idop ni uhur ni Tang Sitimbulan in, seng anjai rebeh ia.
8(21-9) Sai na jumpah tangan-Mu do munsuh-Mu; anjaha sai na jumpah tangan siamun-Mu do na mandomdomi Ham.
9(21-10) Doskon pamurunan do sidea bahenon-Mu bani panorang paroh-Mu, Ham Jahowa, bani parringis-Mu bonduton-Mu do sidea, anjaha panganon ni apuy do sidea.
10(21-11) Boiskonon-Mu do niombah ni sidea hun tanoh on, ginomparni hun tongah-tongah ni jolma manisia.
11(21-12) Anggo ipingkiri sidea na jahat dompak Ham, anggo iranggihon tahi-tahi seng anjai saud ai.
12(21-13) Sai na maporus do sidea bahenon-Mu; tembakon-Mu do bohi ni sidea marhitei sior-Mu.
13(21-14) Jongjong ma Ham, ale Jahowa, ibagas hagogohon-Mu, ase ipuji anjaha idodingkon hanami kuasa-Mu.