Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 22 >> 

Ham Naibatangku, Mase Itadingkon Ham Ahu?

1Bani pambobai koor. Inggouni: Balua manlele siang. Psalm ni si Daud. (22-2) Ham Naibatangku, mase ma itadingkon Ham ahu, mandaoh Ham humbani elek-elekku pakon humbani sora ni doruh-doruhku?

2(22-3) Ham Naibatangku, dilo-dilo do ahu arian, tapi seng ibalosi Ham, borngin pe, tapi seng jumpah ahu hasonangan.

3(22-4) Tapi Ham do Na Pansing in, na marhotak i atas ni sipujion ni Israel.

4(22-5) Ham do ihatengerhon ompungnami, tenger do uhur ni sidea Bamu, gabe ipaluah Ham do sidea.

5(22-6) Hu Bamu do sidea dilo-dilo, gabe maluah do sidea; porsaya do sidea Bamu, jadi seng tarbador sidea;

6(22-7) tapi anggo ahu goya mando, seng be jolma, siapason ni halak, sidorunon ni halak na mabuei.

7(22-8) Haganup na mangidah ahu pahiri-hiri ahu, ipambebeoti do ahu anjaha iupir-upirhon uluni,

8(22-9) “Bani Jahowa ma ia marondos, ase ipaluah ia, anggo na marosuh do tongon Ia bani!”

9(22-10) Ham do na manogu ahu humbani partapaan, Ham do patenger uhurhu mangonsop bagod ni inang;

10(22-11) humbani partubuhku nari Ham do parondosanku, humbani partapaan nari Ham do Naibatangku.

11(22-12) Sai ulang ma mandaoh-daoh Ham humbangku, ai dohor do hasosakan, seng dong sipangurupi.

12(22-13) Buei do lombu jonggi manlioti ahu, anjaha horbou ni Basan mangurup ahu.

13(22-14) Ipangangang bei do babahni dompak ahu, songon singa na manoroh anjaha maraum.

14(22-15) Durus do ahu songon bah, mangkasirang holi-holingku, uhurhu pe songon lilin do, malala ibagas diringku.

15(22-16) Horah do tolonanku songon sanga-sanga, anjaha dilahku longkot do bani langit-langitku; bani orbuk ni hamatean do iparagei Ham ahu.

16(22-17) Ai ilioti baliang do ahu, anjaha hulanan ni parjahat manginggoti ahu, itobaki do tanganku pakon naheihu.

17(22-18) Boi do hubilangi haganup holi-holingku, pasombuhkon do sidea mangidah ahu.

18(22-19) Ibagi sidea do hiouhu, manjomput na sinurat do sidea pasal baju-bajungku.

19(22-20) Tapi Ham Jahowa, ulang ma Ham mandaoh-daoh; Ham hagogohonku, oloskon Ham ma mangurupi ahu!

20(22-21) Sai paluah Ham ma hosahku humbani podang, tonduyhu na lungunan on humbani sisilon ni baliang.

21(22-22) Sai paluah Ham ma ahu humbani babah ni singa, anjaha bansah bahen Ham humbani tanduk ni horbou jalang.

22(22-23) Ambilankononku ma goran-Mu bani saninangku, pujionku ma Ham i tongah-tongah ni kuria in.

23(22-24) Nasiam na mangkabiari Jahowa, puji nasiam ma Ia; haganup ginompar ni si Jakob, pasangap ma Ia, mabiar ma nasiam Bani, nasiam ginompar ni Israel.

24(22-25) Ai seng ongga ipahiri anjaha magigi Ia bani hadoyukon ni na madoyuk, anjaha seng ongga iponopkon bohi-Ni hu bani, itangihon do sanggah dilo-dilo Bani.

25(22-26) Hun Bamu do harohan ni puji-pujianku i tongah-tongah ni kuria na banggal in, galaronku ma bagah-bagahku i lobei ni sagala na mangkabiari-Si.

26(22-27) Sai na mangan anjaha maningon bosur do halak na masombuh; maningon mamuji-muji Jahowa do halak na mangindahi-Si. Sai hinsah do uhur ni sidea sadokah ni dokahni.

27(22-28) Dingaton ni sagala ujung ni tanoh on ma ai anjaha mulak bani Jahowa; sagala bangsa sipajuh begu-begu maningon manrogop do i lobei-Ni.

28(22-29) Ai Jahowa do simada harajaon, anjaha Ia do na mamarentah sagala bangsa.

29(22-30) Nai ma, maningon marsombah do hu Bani sagala na sangap-sangap ni tanoh on, anjaha maningon do manrogop hu lobei-Ni sagala na dob tuad hubagas orbuk ampa halak na so manggoluh be tonduyni.

30(22-31) Sai balosan ni ginompar ni na i pudi do Ia, baritahononkon do pasal Jahowa bani sundut na roh.

31(22-32) Ambilankonon do hapintoron-Ni bani sagala bangsa na laho tubuh ope, paboa Ia do na pasaudkonsi.


  Share Facebook  |  Share Twitter

 <<  Mazmur 22 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran