Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 25 >> 

Pangindoan Pasal Hasasapan ni Dousa ampa Panramotion

1Humbani si Daud. Hu Bamu do Jahowa, hudompakkon tonduyhu.

2Ham Naibatangku, hu Bamu do ahu martenger ni uhur, ulang ma lopas Ham ahu tarbador, ulang ma marsurak-surak munsuhku mangidah ahu.

3Tongon, seng anjai tarbador sagala na marnalom ni uhur Bamu; tapi maningon tarbador do halak pangeluk na so ingkat marhala.

4Ham Jahowa, pabotohkon Ham ma hu bangku dalan Mu, ajarhon Ham ma hu bangku lapang-Mu.

5Sai togu Ham ma ahu ibagas hasintongan-Mu, ajari Ham ma ahu; ai Ham do Naibata ni hatuahonku, Ham do hupanalom ganup ari.

6Sai ingat Ham ma, ale Jahowa, sagala dear ni layak-Mu pakon idop ni uhur-Mu, ai humbani nabasaia nari do in.

7Sai ulang ma padingat-dingat Ham dousa haposoonku pakon panlanggaronku, sai ingat Ham ma ahu romban hubani idop ni uhur-Mu, halani dear ni layak-Mu, Ham Jahowa.

8Layak anjaha bonar do Jahowa, halani ai ipatuduh do dalan na pintor bani pardousa.

9Itogu-togu do halak na madoyuk mardalan ibagas hasintongan, anjaha iajarhon do dalan-Ni bani halak na masombuh.

10Sagala dalan ni Jahowa idop ni uhur do ai ampa hasintongan, bani halak na manramotkon padan-Ni pakon hasaksian-Ni.

11Halani goran-Mu, Ham Jahowa, sasap Ham ma dousangku, ai banggal do in.

12Ise do halak na mangkabiari Jahowa? Hubani do ajarhonon-Ni dalan sipilihon-Ni.

13Tonduy-Ni marianan do bani hasonangan, anjaha ginomparni do manean tanoh on.

14Udung do uhur ni Jahowa bani na mangkabiari-Si, ipabotohkon do padan-Ni bani sidea.

15Sai mangkawah do matangku dompak Jahowa, ai Ia do paluahkon naheihu humbani siding.

16Dompakkon Ham ma ahu, maidop ma uhur-Mu bangku, ai lungunan anjaha madoyuk do ahu.

17Palumbang Ham ma ahu humbani hasosakan ni uhurhu, paluah Ham ma ahu humbani hasunsahanku.

18Kawahkon Ham ma hadoyukonku pakon hangalutonku, sasap Ham ma haganup dousangku.

19Tonggor Ham ma, buei do munsuhku, anjaha parah do pandomdomini sidea bangku.

20Ramotkon Ham ma tonduyhu anjaha paluah Ham ma ahu, ulang tarbador ahu, ai Bamu do ahu marlingod.

21Sai hapansingon ampa hapintoron ma manramotkon ahu, ai Bamu do ahu marhatengeran.

22Ham Naibata, sai paluah Ham ma Israel, humbani haganup hasosakanni.


  Share Facebook  |  Share Twitter

 <<  Mazmur 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel