Dual PanelDoding Tarima Kasih halani Maluah
1Psalm. Doding pamongkoton ni Rumah Panumbahan. Humbani si Daud. (30-2) Sihol do patimbulonku Ham Jahowa, ai Ham do na mandokdok ahu humbani ianan na bagas, anjaha seng ipalopas Ham marmegah-megah munsuhku mangidah ahu.
2(30-3) Ham Jahowa, Naibatangku, hu Bamu do ahu dilo-dilo, jadi ipamalum Ham do ahu.
3(30-4) Ham Jahowa, domma ipanaik Ham tonduyhu hun nagori toruh, domma ipagoluh Ham use ahu, maluah humbani na manuruk tanoman.
4(30-5) Dodingkon nasiam ma Jahowa, nasiam hinaholongan-Ni, puji ma goran-Ni na pansing in!
5(30-6) Ai tongkin do panomboh ni ringis-Ni, sadokah manggoluh do anggo idop ni uhur-Ni, bodari sogop partangison, patarni masa parolob-oloban.
6(30-7) Tapi anggo ahu sanggah sonang ongga huhatahon, “Seng anjai targompang ahu.”
7(30-8) Ham Jahowa, marhitei dear layak-Mu ipatotap Ham do ahu i atas ni dolog na toguh; hape ijin iponopkon Ham bohi-Mu mintor tarsonggot ahu.
8(30-9) Hu Bamu do ahu dilo-dilo, Ham Jahowa, hubani Naibatangku do ahu mangelek-elek.
9(30-10) Aha ma laba-Mu marhitei darohku, anggo tuad ahu hu tanoman? Boi ma pujion ni orbuk Ham atap patugahonni habujuron-Mu?
10(30-11) Tangihon Ham ma Jahowa, maidop ma Ham bangku, Ham Jahowa, sai Ham ma pangurupi bangku!
11(30-12) Domma ipaubah Ham tangisku gabe tortor bangku. Domma itanggali Ham pusok ni uhurhu, anjaha igonditkon Ham do bangku malas ni uhur,
12(30-13) ase mandoding-doding tonduyhu Bamu anjaha lang masip. Ham Jahowa, Naibatangku, sadokah ni dokahni do Ham pujionku.