Dual PanelHatuahon ni Halak na dob Sinasap Dousani
1Humbani si Daud. Doding podah. Martuah ma halak na dob sinasap panlanggaronni, na dob nirungkub dousani.
2Martuah ma halak anggo seng ihira Jahowa bani hajahaton, anjaha seng dong sipakulah-kulah ibagas tonduyni.
3Ai sadokah huhasipkon dousangku, reong do holi-holingku ibahen tangisku ganup ari.
4Ai sai idondoni tangan-Mu do ahu arian pakon borngin, jadi horah ma darohku songon pambahen ni milas ni logou ni ari. Sela.
5Hupabotohkon ma Bamu dousangku, anjaha seng huponopkon hajahatonku, ningku do, “Sopotkononku ma panlanggaronku hubani Jahowa, jadi isasap Ham do utang ni dousangku.”
6Halani ai martonggo ma hu Bamu sagala na daulat maruhur, sanggah adong ope panorang boi marjumpah; roh pe sompong bah marraja, seng anjai das ai hu bani.
7Ham do parlingodanku, iramotkon Ham do ahu humbani hasosakan, haluahon do iinggotkon Ham bangku. Sela.
8Huajari anjaha hupodahi pe ho pasal dalan sidalananmu, huparmaloi anjaha iiring-iring pangkawahku pe ho.
9Ulang ma nasiam songon huda atap halode na so maruhur, na so ra dohor bam anggo lang pinaksa ni tali pakon kokang.
10Buei do siandungon ni parjahat, tapi barang ise na martenger ni uhur bani Jahowa, inggotkonon-Ni do bani idop ni uhur.
11Marmalas ni uhur anjaha marolob-olob ma sagala parpintor ibagas Jahowa; marmegah-megah ma ganup paruhur na pintor.