Dual PanelPuji-pujian ampa Pambalosion bani Jahowa Sipanompa ampa Sipanrajai in
1Marolob-olob ma nasiam halak parpintor ibagas Jahowa, patut do mamuji-muji paruhur na bujur.
2Puji ma Jahowa marhasoman husapi, dodingkon nasiam ma Ia marhitei husapi sisapuluh tali.
3Dodingkon nasiam ma Bani doding na baru, giut nasiam ma tali husapi marhasoman tarompit.
4Ai pintor do hata ni Jahowa, anjaha sintong do sagala pambahenan-Ni.
5Holong do uhur-Ni bani hapintoron ampa uhum. Idop ni uhur ni Jahowa do manggoki tanoh on.
6Marhitei hata ni Jahowa do ijadihon langit, anjaha marhitei hosah ni pamangan-Ni sagala bala-Ni.
7Ipatumpu do bah ni laut songon bongbongan, ibahen do laut bolag ai markamar-kamar.
8Sai marhabiaran bani Jahowa ma ganup tanoh on, anjaha gobir ma i lobei-Ni ganup sindunia on.
9Ai marsahap Ia gabe jadi ma, ai mamarentah Ia gabe adong ma.
10Jahowa do mansedahon riah ni bangsa parbegu, seng asi ibahen pingkiran ni bangsa-bangsa.
11Tapi ranggian ni Jahowa totap do sadokah ni dokahni, pingkiran ni uhur-Ni pe marsundut-sundut do.
12Martuah ma bangsa na mambahen Jahowa Naibatani, ai ma bangsa pinilih-Ni gabe parbagianan Bani.
13Manatap-natap do Jahowa hun nagori atas, ikawahkon ganup anak ni jolma in.
14Humbani ianan-Ni marparatas tonggor do Ia bani haganup na mangiankon tanoh on.
15Ia do na manjadihon uhur ni sidea, Ia mardiateihon sagala horja ni sidea.
16Seng monang raja marhitei buei ni bala, seng maluah puanglima marhitei surung ni gogoh.
17Taroto do halak na mangajamkon gogoh ni huda, ai marhitei gogohni na buei ai seng boi ia paluahkon.
18Tonggor ma, dompak na mangkabiari-Si do mata ni Jahowa, dompak halak na marpangarapan bani idop ni uhur-Ni,
19laho paluahkon tonduy ni sidea humbani hamatean, anjaha laho pagoluhkon sidea bani musim lohei.
20Marhatengeran bani Jahowa do tonduynami, Ia do pangurupi pakon gantar bennami.
21Ai marhiteihon-Si do malas uhurnami; ai bani goran-Ni na pansing in do hanami marhatengeran.
22Sai sorap ma, Ham Jahowa, idop ni uhur-Mu bennami, songon na niarapkonnami hun Bamu.