Dual PanelIramotkon Tuhan do Siminik-Ni
1Humbani si Daud, Sanggah Ipapodou-podou Dirini i lobei ni si Abimelek, gabe Iusir Ia Lanjar Laho. (34-2) Sai pujionku do Jahowa bani sagala panorang, tongtong do puji-pujian-Ni ibagas pamanganku.
2(34-3) Marhitei Jahowa do marmegah-megah tonduyhu, ibogei halak na madoyuk ma ai gabe malas ma uhurni.
3(34-4) Hasomani nasiam ma ahu pabanggalhon Jahowa, sai rap ma hita patimbulhon goran-Ni in.
4(34-5) Hupindahi do Jahowa, anjaha ibalosi do ahu; ipaluah do ahu humbani sagala habiaranku.
5(34-6) Mangkawah ma nasiam hu Bani, ase minar nasiam, gabe lang tarmela bohi nasiam.
6(34-7) Dilo-dilo do halak na masombuh on, itangihon Jahowa do ia, anjaha ipaluah do ia humbani haganup hasosakanni.
7(34-8) Marjaga do malekat ni Jahowa inggot bani na mangkabiari-Si, anjaha ipaluah do sidea.
8(34-9) Dai anjaha tonggor nasiam ma dear ni layak ni Jahowa, martuah ma halak na martenger ni uhur Bani.
9(34-10) Habiari nasiam ma Jahowa, nasiam sagala na pansing, ai seng anjai marhahurangan sagala na mangkabiari-Si.
10(34-11) Anak ni singa hurangan do anjaha loheian, tapi seng anjai hurangan bani sagala na madear halak na mangindahi Jahowa.
11(34-12) Roh ma, nasiam anak, tangihon nasiam ma hatangku, ase huajarhon bani nasiam biar dompak Jahowa.
12(34-13) Ise halak na sihol mangkaholongi goluh on, na mangkarosuhkon mangidah ari na madear?
13(34-14) Jaga ma dilahmu dompak hajahaton, ampa bibirmu humbani hata tipu.
14(34-15) Surut ma ho humbani na masambor, horjahon na madear, pindahi damei anjaha parayak ma ai.
15(34-16) Dompak halak parpintor do mata ni Jahowa, anjaha pinggol-Ni dompak dilo-dilo ni sidea.
16(34-17) Ilawan bohi ni Jahowa do sihorjahon na jahat, laho mamboiskon hun tanoh on pardingat ni sidea.
17(34-18) Anggo dilo-dilo halak parpintor, sai itangihon Jahowa do, anjaha ipaluah do sidea humbani haganup hasosakanni.
18(34-19) Dohor do Jahowa bani halak paruhur na marosak, anjaha ipaluah partonduy na maropuk.
19(34-20) Buei pe sitaronon ni halak parpintor, tapi ipaluah Jahowa do ia humbani haganupan ai.
20(34-21) Ia do manramotkon ganup holi-holini, ase ulang maponggol age sada.
21(34-22) Sai hamatehonon ni parjahat do hajahaton, anjaha maningon marutang do na mandomdomi halak parpintor.
22(34-23) Jahowa do sitobus tonduy ni juakjuak-Ni, anjaha seng anjai marutang sagala na martenger ni uhur Bani.