Dual PanelHapitungon ni Halak Pardousa ampa Hatuahon ni Parpintor
1Bani pambobai koor. Humbani si Daud, juakjuak ni Naibata. (36-2) Marhusipi do dousa ibagas uhur ni parjahat; seng dong biar dompak Naibata bani parjahat.
2(36-3) Ai iipuk-ipuk do dirini ibagas uhurni, paboa seng anjai tardapot hajahatonni atap hagigihononkon ia.
3(36-4) Guak pakon ladung do hata-hata ni pamanganni; domma mangadi ia mandalankon horja hasintongan ampa na madear.
4(36-5) Na jahat do hansa ipingkiri i podomanni, idompakkon do dalan na masambor; seng ihagigihon hajahaton.
5(36-6) Ham Jahowa, sundol do ronsi langit idop ni uhur-Mu, anjaha hasintongan-Mu das do bani hombun.
6(36-7) Songon dolog ni Naibata do toguh ni hapintoron-Mu, anjaha songon bah ni laut na so tarsibar do panguhum-Mu. Ham do sipaluah jolma pakon pinahan, ale Jahowa.
7(36-8) Mantin ni in idop ni uhur-Mu Ham Naibata, i linggom ni habong-Mu do marlingod anak ni jolma;
8(36-9) ibosuri sidea do dirini bani taboh-taboh ni rumah-Mu, ipainum Ham do sidea humbani bah harosuh-Mu,
9(36-10) ai i lambung-Mu do bah tubuh hagoluhan, ibagas haliharon-Mu ididah hanami haliharon.
10(36-11) Torus ma patuduhkon Ham idop ni uhur-Mu bani na mananda Ham, ampa hasintongan-Mu bani sibujur uhur.
11(36-12) Sai ulang ma mangonai bangku tunjang-tunjang ni sigijang uhur, sai ulang ma iusir tangan ni halak parjahat ahu.
12(36-13) Gobir anjaha mangkatompas do sihorjahon hajahaton, ijombahon do sidea, anjaha seng tarbahensi be jongjong.