Dual PanelMardamei Ibagas Jahowa
1Bani pambobai koor. Marhasoman husapi. Psalm ni si Daud. (4-2) Anggo dilo-dilo ahu, balosi Ham ma ahu, Ham Naibata, Sipintori ahu. Domma ipalumbang Ham ahu ibagas hasosakanku, sai maidop ma uhur-Mu bangku anjaha tangihon Ham ma tonggongku.
2(4-3) Nasiam dalahi, sadiha dokah nari mapas uhur nasiam pasambor samborhon hasangaponku, sadiha dokah nari haholongan nasiam na so marguna anjaha pindahan nasiam ladung? Sela.
3(4-4) Botoh nasiam ma, domma ipilih Jahowa sada haholongan-Ni Bani. Itangihon Jahowa do anggo hudilo Ia.
4(4-5) Boi do manggila, tapi ulang mardousa. Marpingkir-pingkir ma nasiam ibagas uhur bani podoman nasiam, tapi sipsip ma nasiam. Sela.
5(4-6) Galangkon ma galangan na sintong, anjaha ajamkon ma Jahowa.
6(4-7) Buei do na mangkatahon, “Ise ma na manumpakkon na madear banta?” Sondangkon Ham ma sinalsal ni bohi-Mu bennami, Ham Jahowa.
7(4-8) Bueinan do malas ni uhur ibere Ham hubagas uhurhu, marimbang malas ni uhur ni sidea sanggah pariama omei pakon pariama anggur na junah.
8(4-9) Ibagas damei hupatibal diringku lanjar sinok, ai Ham do hansa Jahowa na mambahen sonang ahu marianan.