Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 45 >> 

Doding bani Parunjukon ni Raja

1Bani pambobai koor. Inggouni: Bunga silundat. Humbani ginompar ni si Korah. Doding podah. Doding marsihaholongan. (45-2) Marsual-sual do humbagas uhurhu hata na madear, pajojoronku ma dodingku bani raja in; Songon mata pena do dilahku ibagas tangan ni halak na pandei manurat.

2(45-3) Ham do sijengesan i tongah-tongah ni anak ni jolma, hajengeson do inahkon bani bibirmu, tongon, Naibata do mamasu-masu ham tongtong.

3(45-4) Solotkon ham ma podangmu bani binongeimu, ham puanglima, hamuliaonmu pakon jumbalangmu!

4(45-5) Ibagas jumbalangmu, maju ma ham marhamonangan mangkopkop hasintongan ampa hapintoron. Ajaran ni tangan siamunmu ma ham mandalankon pambahenan na marhajombuton.

5(45-6) Marot-marot ma panahmu, tunduk ma bangsa-bangsa i lobeimu, anjaha madatei ma uhur ni munsuh ni raja in.

6(45-7) Hotakmu, tuannami, totap do ronsi sadokah ni dokahni, tungkot hapintoron do tungkot harajaonmu.

7(45-8) Holong do uhurmu bani hapintoron, magigi do ham bani hajahaton, halani ai do, tuannami, ase iminakkon Naibatamu minak malas ni uhur bamu, marhasurungan humbani hasomanmu.

8(45-9) Mir, aloe pakon kassia do mammorumi hioumu ganupan; malas do uhurmu ibahen parugas sigiuton na hun rumah bolon gading;

9(45-10) boru ni raja do deba humbani siparugasmu; i siamunmu do jongjong puangbolon marpakeian omas na hun opir.

10(45-11) Tangihon ham ma, ale boru ni raja in, tonggor ham ma, paeleng ham ma pinggolmu, halupahon ham ma bangsamu pakon rumah ni bapamu!

11(45-12) Sai iharosuhkon raja in ma hinajengesmu, ai ia do tuanmu, tunduk ma ham manombah hu bani.

12(45-13) Roh do boru Tirus mamboan siluahni, anjaha na sangap-sangap humbani bangsa ai marsombah mambuat uhurmu.

13(45-14) Marpakeian jenges do boru ni raja in, na binuat bani omas do pakeianni.

14(45-15) Marpakeian na hinarawang do ia ibobahon bani raja in, anak boru mangirikkon, huan-kuanni mangkasomanisi;

15(45-16) marhasoman malas ni uhur ampa olob-olob ibobahon ma ia, masuk hu rumah bolon ni raja in.

16(45-17) Sai anakmu ma na manggantih na lobeimu, ham ma na pabangkit sidea gabe panrajai bani sab nagori on.

17(45-18) Baritahononku ma goranmu bani halak marsundut-sundut, halani ai pujion ni sagala bangsa ma ham sadokah ni dokahni.


  Share Facebook  |  Share Twitter

 <<  Mazmur 45 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel