Naibata do Batar-batar Banta
1Bani pambobai koor. Humbani ginompar ni si Korah. Inggouni: Alamot. Sada doding. (46-2) Naibata do haporusan ampa hagogohon banta, pangurupi banggal tongon bani panorang hasosakan.
2(46-3) Halani ai seng anjai mabiar hita, age pe mosor tanoh on, anjaha munjom dolog hu tongah-tongah ni laut,
3(46-4) age pe marhasak anjaha marguboh bahni, anjaha dugur dolog ibahen gunsangni. Sela!
4(46-5) Adong sada bah bolon, bahni pamegahkon huta ni Naibata, ianan tang na pansing bani Sitimbulan in.
5(46-6) Naibata do i tongah-tongahni, seng anjai doyuk huta in, manlele siang ope domma iurupi Naibata ia.
6(46-7) Geor pe sagala bangsa anjaha dugur sagala harajaon, tapi marsora honsi Ia malala ma tanoh on.
7(46-8) Jahowa Zebaot do hasomanta, Naibata ni si Jakob do batar-batar banta. Sela.
8(46-9) Eta, roh ma nasiam mangidah horja ni Jahowa, na parohkon songgot-songgot i atas tanoh on,
9(46-10) na pasohkon parmunsuhan das hu ujung ni tanoh on, na mambahen marponggolan sior, maropuk tanja, na manutungi gareta porang ibagas apuy.
10(46-11) Parontihon hanima ma, anjaha tanda ma, paboa Ahu do Naibata, na timbul i tongah-tongah ni bangsa-bangsa, timbul i tanoh on.
11(46-12) Jahowa Zebaot do hasomanta, anjaha Naibata ni si Jakob do batar-batar. Sela.