Dual PanelParsombahan na Sintong
1Psalm ni si Asap. Naibata, Naibata Jahowa marsahap anjaha mardilo bani tanoh on, humbani hapoltakan das hu hasundutan.
2Hun Sion, pakpak ni hajengeson, marsinalsal Naibata.
3Na roh ma Naibatanta anjaha seng sip Ia, apuy na margajag-gajag do i lobei-Ni, anjaha haba-haba na gogoh manlioti-Si.
4Idilo do langit na i babou, sonai tanoh laho manguhumi bangsa-Ni,
5“Pahumpul ma Bangku halak na Huhaholongi, na mambahen parpadanan Bangku marhitei galangan.”
6Langit mambaritahon hapintoron-Ni, ai Naibata sandiri do panguhum.
7Tangihon ma, ale bangsang-Ku, ase marsahap Ahu; ale Israel, sihol saksihonon-Ku do bannima, “Naibata, Naibatamu do Ahu.”
8Sedo halani galangan sisayatonmu ase Hupinsang ho; galangan situtungonmu tongtong do i lobei-Hu.
9Seng porlu buaton-Ku lombu hun rumahmu atap hambing tunggal humbani harang ni pinahanmu,
10ai Ahu do simada binatang na i harangan, pinahan na marribu-ribu na adong i atas dolog.
11Hutanda do sagala manuk-manuk na i awang-awang, anjaha saguru Bangku do sagala na manggulmit i talun.
12Porini pe loheian Ahu, seng pala hatahonon-Ku bam, ai gok Bangku do dunia on ampa sagala isini.
13Mintor panganon-Ku ma nani daging ni lombu jonggi, atap inumon-Ku ma daroh ni hambing tunggal?
14Galangkon ma banggal ni uhur bani Naibata, anjaha galari ma bagah-bagahmu bani Sitimbulan in;
15anjaha dilo ma Ahu bani ari hasosakan, ase Hupaluah ho anjaha ipuji ho Ahu.
16Tapi bani parjahat ihatahon Naibata do, “Aha do hakmu pajojorhon titah-Ku, anjaha manobut-nobut padan-Ku marhitei babahmu?
17Hape ho do mangkagigihon sipaingat, anjaha ho do manundali hatang-Ku!
18Anggo ididah ho panangko, marosuh do ho mangkasomanisi, anjaha sapanriah do ho rap pakon parbangkis.
19Ipalopas ho do pamanganmu mansahapkon hajahaton, ampa dilahmu mandandan panipuon.
20Sai hundul-hundul do ho mangkatai saninamu, sai ipahiri ho do anak ni inangmu.
21Sonai do ibahen ho, tapi sai sip do Ahu; jadi iagan ho doskon ho Ahu. Ahu do manguhum ho anjaha patidakon-Ku ma ai i lobei ni matamu.
22Parimbagaskon ma ai, ale sihalupahon Naibata, ase ulang roh Ahu manoroh, gabe ise pe lang boi paluahkon.
23Ise na manggalangkon banggal ni uhur, ai do na pasangapkon Ahu, anjaha ise na mardalan ibagas hapintoron, hubani do patalaron-Ku hatuahon-Ku.”