Dual PanelTonggo Mangindo Pangurupion Marimbang Munsuh
1Bani pambobai koor. Inggouni: Ulang parseda. Doding podah humbani si Daud, sanggah isuruh si Saul ia manjaga rumahni laho mamunuhsi. (59-2) Paluah Ham ma ahu humbani munsuhku, Ham Naibata; ondingi Ham ma ahu marimbang sagala imbangku.
2(59-3) Paluah Ham ma ahu humbani sihorjahon hajahaton, anjaha paluah Ham ma ahu humbani siduruskon daroh.
3(59-4) Ai tonggor ma, iuhurhon sidea do goluhku; halak siparkuasa mandorab ahu, age pe seng dong panlanggaronku, seng dong dousangku, Ham Jahowa.
4(59-5) Age pe seng marsalah ahu, roh do sidea mandorab domma sirsir bei. Hehe ma Ham manjumpahkon ahu anjaha kawah ma Ham!
5(59-6) Ham Jahowa, Naibata Zebaot, Naibata ni Israel! Hehe ma Ham marlulu bani bangsa parbegu! Ulang ma maidop Ham dompak halak partahi-tahi na jahat in. Sela.
6(59-7) Mulak do sidea ganup bodari, mangorongi songon baliang, iinggoti sidea do huta in.
7(59-8) Tonggor ma, buei do sahap-sahap ni babahni; podang do longkot bani dilahni, ise ma na patangi-tangi ai!
8(59-9) Tapi Ham Jahowa, tartawa do Ham mangidah sidea, mapas do Ham mangidah sipajuh begu-begu ganup.
9(59-10) Ham Pargogohku, hu Bamu do ahu mangkawah, ai Ham do Naibata, batar-batar bangku.
10(59-11) Naibatangku paridop ni uhur, in do na mangalo-alo ahu; Naibata do mambahen marmalas ni uhur ahu mangidah imbang-imbangku.
11(59-12) Ulang ma mintor bunuh Ham sidea, Ase ulang lupa bangsangku; pamerap Ham ma sidea marhitei hagogohon-Mu, dob ai tompaskon Ham ma sidea, Ham Tuhannami, gantarnami.
12(59-13) Halani dousa ni pamanganni, sahap-sahap ni bibirni, bahen Ham ma sidea tardapot ibagas hatoalonni, halani pamuraion pakon ladung, na hinatahonni.
13(59-14) Boiskon Ham ma sidea ibagas ringis-Mu, boiskon Ham ma sidea, ronsi lang dong be sidea, ase ibotoh halak, Naibata do hape na manggomgom Jakob, das hu ujung ni tanoh on. Sela.
14(59-15) Mulak do sidea ganup bodari, mangorongi songon baliang, iinggoti sidea do huta in.
15(59-16) Maor-aor do sidea mangindahi sipanganon, marmungut-mungut, anggo lang bosur sidea.
16(59-17) Tapi anggo ahu sai dodingkononku do hagogohon-Mu, janah olobkononku do sogod idop ni uhur-Mu; ai Ham do batar-batar anjaha haporusanku sanggah tarsosak.
17(59-18) Ham pargogohku, Ham do dodingkononku, Ham do Naibata batar-batar bangku, Naibatangku na maridop ni uhur bangku.