Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 71 >> 

Tonggo Mangindo Pangapition bani Panorang Matua

1Bamu do, Ham Jahowa ahu marlingod, ulang lopas Ham ahu bador lalab.

2Pabansah Ham ma ahu halani hapintoron-Mu, anjaha paluah Ham ma ahu; paeleng Ham ma pinggol-Mu bangku, anjaha urupi Ham ma ahu.

3Ham ma gabe dolog batu parlingodan bangku, benteng na toguh bahen haluahonku; tongon, Ham do dolog batu ampa batar-batar bangku.

4Ham Naibatangku, sai paluah Ham ma ahu humbani tangan ni parjahat, humbani tangan ni pargeduk pakon sibahen paksa.

5Ham do pangarapanku Tuhan; Ham Jahowa, hatengeran ni uhurhu humbani sietek-etekonku nari.

6Ham do pangunsandeianku humbani partapaan nari, humbani boltok ni inang nari Ham do pangurupi bangku, Ham do tongtong sipujionku.

7Gabe halongangan do ahu bani buei halak, halani Ham do haporusanku na toguh.

8Sai gok do pamanganku bani puji-pujian Bamu, gok hahormaton Bamu manipat ari.

9Ulang ma ambukkon Ham ahu dob matua; bani na lambin bois gogohku, ulang ma tadingkon Ham ahu.

10Ai ipahata-hata munsuhku do ahu, halak na manguhurhon hosahku manriahi,

11nini sidea, “Domma itadingkon Naibata ia, ayak-ayak anjaha tangkap ma ia, seng dong be na paluahkonsi.”

12Ham Naibata, sai ulang ma ganggang Ham humbangku, Ham Naibatangku, papodas Ham ma mangurupi ahu.

13Sai maila anjaha magou ma sidea na mamunsuhi ahu; sai tarbador anjaha masese ma sidea na mangindahi hamagouanku.

14Tapi anggo ahu, tongtong do marpangarapan, anjaha papuji-pujionku do Ham.

15Sai baritahononkon ni pamanganku do hapintoron-Mu, sonai haluahon na hun Bamu ari-ari, ai seng tarbilangi ahu ai.

16Roh do ahu, mangunsagahkon hagogohon ni Jahowa, mambaritahon hapintoron, hapintoron-Mu tumang.

17Ham Naibata, Ham do mangajari ahu humbani sietek-etekon nari, ronsi sonari sai huambilankon do halongangan na binahen-Mu.

18Age ronsi matua ahu anjaha lopak ubanku, Ham Naibatangku, ulang ma tadingkon Ham ahu; ase huambilankon pambahenan ni tangan-Mu bani sundut on, sonai hagogohon-Mu bani ginompar na sihol roh.

19Age hapintoron-Mu, na das ronsi langit ai, Ham Naibata, Ham sibahen halongangan banggal, ise ma na songon Ham, ale Naibata?

20Ham, na dob padageihon bennami hasosakan pakon parmaraan, sai pagoluhon-Mu do hanami use, sai panaikon-Mu do hanami use humbagas luhung-luhung ni tanoh on.

21Sai tambahan-Mu do habanggalonku, anjaha sai apohon-Mu do ahu.

22Jadi ahu pe, sai pujionku do Ham marhitei arbap, halani hasintongan-Mu, ale Naibata; sai dodingkononku do Ham marhitei husapi, Ham na ma pansing ni Israel.

23Marolob-olob do bibir hubani na mandoding-doding ahu Bamu, age tonduyhu na dob pinaluah-Mu.

24Dihut do dilahku, mansahap-sahapkon hapintoron-Mu ari-ari, ai domma maila anjaha tarbador na manguhurhon hamagouanku.


  Share Facebook  |  Share Twitter

 <<  Mazmur 71 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel