Dual PanelNaibata Panguhum ni Tanoh on
1Bani pambobai koor. Marhasoman husapi. Psalm humbani si Asap. Sada doding. (76-2) Tarbarita do Naibata i Juda, timbul do goran-Ni i Israel.
2(76-3) Adong do i Salem lampolampo-Ni, anjaha i Sion ianan-Ni.
3(76-4) Ijai do iponggolhon panah na marapuy. Sonai gantar, podang pakon parugas marmunsuh. Sela.
4(76-5) Marhidoratan anjaha marmuliaan do Ham, humbani dolog sisadokah ni dokahni.
5(76-6) Hona taban do halak na barani marmunsuh, renges do sidea modom, anjaha sagala puanglima lenduk tanganni.
6(76-7) Halani asup-asup-Mu, alo Naibata ni si Jakob, renges do modom pargareta sonai ge hudani.
7(76-8) Jombut tumang do Ham, mintor ise ma na pag jongjong i lobei-Mu bani panomboh ni ringis-Mu?
8(76-9) Hun nagori atas do ipabogeihon Ham uhur-Mu, gabe mabiar ma tanoh on anjaha jonong,
9(76-10) bani panorang ni Naibata jongjong mandabuh uhum, laho paluahkon na madoyuk i tanoh on. Sela.
10(76-11) Tongon, ringis ni jolma pe gabe puji-pujian do Bamu, anjaha igonditkon Ham do Bamu teba-teba ni ringis ni sidea.
11(76-12) Bahen ma bagah-bagahmu anjaha galari ma ai bani Jahowa Naibatamu. Nasiam sagala na manginggotisi, padas nasiam ma sombah-sombah Bani Na Majombut in.
12(76-13) Ia do na paunduk paruhuron ni na sangap-sangap, marjumbalang do Ia bani parkuasa ni tanoh on.