Alkitab Mobile SABDA
[VER] : [SIMALUNGUN]     [PL]  [PB] 
 <<  Mazmur 78 >> 

Podah humbani na dob Masa

1Doding podah humbani si Asap. Tangihon nasiam ma, ale bangsangku, podahku, tarehon ma pinggol nasiam hubani hata ni pamanganku.

2Sihol do buhaonku pamanganku mangkatahon umpama, sihol do patalaronku rusia humbani panorang na basaia.

3Na dob binogeinami ampa binotohnami, na tinuri-turihon ni na lobeita hu bennami.

4Seng bulih ponopkononnami ai bani niombah ni sidea, tapi maningon baritahononkon do bani sundut na mangihut; ai ma pambahenan sipasangap Jahowa, pakon hagogohon-Ni, ampa halongangan na binahen-Ni ai.

5Domma ipajongjong sada hasaksian bani Jakob, ibere sada titah bani Israel, itonahkon do bani ompungta pasal ai, ase ipabotohkon ai bani niombah ni sidea,

6ase ibotoh sundut na mangihut ai, ase ginompar na sihol tubuh ai jongjong mambaritahon ai bani niombahni,

7ase ibahen sidea Naibata hatengeran ni uhur ni sidea. Anjaha ulang ihalupahon pambahenan ni Naibata, na banggal ai, tapi ihorjahon ma titah-Ni,

8ase ulang sidea gabe doskon ompung ni sidea, ai ma sundut siparbalik anjaha sipanggeori, sundut na so totap uhurni, anjaha tonduyni seng totap bujur dompak Naibata.

9Anak ni si Efraim, marsinjatahon sior, manginsurut do bani parporangan.

10Seng iramotkon sidea parpadanan binahen ni Naibata, anjaha mangengkar do sidea mardalan domu hubani titah-Ni.

11Lupa do sidea bani pambahenan-Ni na banggal ai, pakon bani tanda halongangan, na dob pinatuduhkon-Ni bani sidea.

12I lobei ni mata ni ompung ni sidea ibahen do halongangan, i tanoh Masir, bani talun Soan.

13Ibolah do laut, laho padiparhon sidea, ibongbong do bah songon bongbongan.

14Ibobahon do sidea marhitei hombun arian, marhitei sondang ni apuy borngin.

15Ibolah do dolog batu i halimisan, ibere do sidea sombuh minum songon humbani bah banggal;

16Iparoh do bah humbani dolog batu, anjaha ibahen do bah mabaor songon bah mardalan.

17Tapi sai inunut sidea do mardousa dompak-Si, iimbang do Ia Na Tang Sitimbulan in i halimisan.

18Sai ilajou sidea do Naibata ibagas uhurni, itunggu sidea do sipanganon pasombuh hisapni.

19Marungut-ungut do sidea dompak Naibata, nini, “Mintor mangasup ma Naibata pasirsirhon sipanganon i halimisan?”

20Tongon, ibogbog do dolog batu gabe mabaor bah, marbanggal binanga, tapi mintor tarbahen-Si ma mambere ruti atap pasirsirhon gulei bani bangsa-Ni?

21Halani ai, dob ibogei Jahowa ai, manggila ma Ia, gajag ma apuy mandorab Jakob, marjimbur gila dompak Israel,

22halani seng porsaya sidea bani Naibata, anjaha seng tenger uhurni bani pangurupi-Ni.

23Jadi ibere ma parentah bani hombun na i atas, anjaha ibuha labah ni langit.

24Ipaturun ma bani sidea udan manna, anjaha ibere ma bani sidea gandum nagori atas.

25Ruti ni malekat do ipangan ganup sidea, bohal do itongos bani sidea laho pabosurhon.

26Ibahen do logou hapoltakan marombus i langit, anjaha iparroh logou dangsina marhitei gogoh-Ni.

27Ipaturun do bani sidea gulei songon orbuk bueini, anjaha manuk-manuk na marhabong songon horsik na i topi ni laut.

28Ipandabuhkon hu tongah-tongah ni parsaranan ni sidea, inggot bani ianan ni sidea.

29Mangan do sidea anjaha bosuran, na pinindo ni uhur ni sidea ibere do bani sidea.

30Lape sombuh ope sidea mansuhuni hisap-hisapni, ongom ope sidea bani sipanganon,

31jadi gajag ma ringis ni Naibata mandorab sidea, ibunuh ma buei na sangap-sangap ni sidea, anjaha rasei na maposo ni Israel.

32Age pe sonai ganup na masa ai, inunut sidea do mardousa, anjaha seng ihaporsayai halongangan na binahen-Ni.

33Jadi iboiskon ma ari-ari ni sidea gabe na lang ampa tahun ni sidea gabe hasonggotan.

34Anggo roh Ia mambunuh sidea, ipindahi sidea ma Ia, mulak ma sidea pindah-pindah bani Naibata.

35Idingat sidea ma, Naibata do hape dolog batu bani sidea, anjaha Naibata, Na Tang Sitimbulan in do sipaluah bani sidea.

36Tapi ipalemes-lemes do parsahap ni Bani, anjaha iladungi Ia marhitei dilahni.

37Seng totap uhur ni sidea Bani, anjaha seng totap sidea bani padan-Ni.

38Tapi Ia, siparontou ni uhur, isasap do dousa ni sidea, seng iboiskon sidea. Gati do iampogi ringis-Ni, anjaha seng ganup ringis-Ni ipadalan.

39Ai idingat, daging do sidea, logou na mangombus anjaha seng mulak be.

40Gatini in sidea mamuhoi ringis-Ni i halimisan, anjaha manunsahi-Si bani tanoh dorging-dorging ai!

41Iulak-ulak sidea do manlajou Naibata, anjaha ipusoki uhur ni Na Pansing ni Israel.

42Seng mardingat be sidea bani hagogohon-Ni, bani ari na pinaluah-Ni sidea humbani imbangni;

43sanggah binahen-Ni tanda i Masir, ampa halongangan-Ni bani talun Soan.

44Ipaubah do bahni gabe daroh, ampa binangani, gabe lang tarinum.

45Itongos do bani sidea rongit laho mamboiskonsi, ampa tiktikan laho mansedahon.

46Bani tamponok do ibere suan-suanan ni sidea, anjaha hinorjahonni bani balang.

47Matei do anggur ni sidea ibahen sira-sira, ampa hayu ara ni sidea ibahen namur na borgoh.

48Rasei do pinahan ni sidea ibahen bunrung, anjaha marmateian hulanan ni biribirini ibahen sampar.

49Itongos do bani sidea apuy ni ringis-Ni, gila, marah ampa hasosakan, malekat sipangagou na marhulan-hulan.

50Ipaturut do mardalan ringis-Ni, seng iramotkon tonduy ni sidea humbani hamatean, tapi iondoskon do goluh ni sidea hubani sampar.

51Ibogbog do ganup bunga tubuh ni Masir, ai ma limbuah ni gogoh ni sidea, bani lampolampo ni si Ham.

52Ipaingkat do bangsa-Ni songon biribiri, anjaha ibobai sidea songon hulanan i halimisan.

53Sonang do sidea iiring-iring, seng pala marhabiaran, tapi anggo munsuhni rungkub do ibahen laut.

54Ibobahon do sidea hu tanoh-Ni na pansing in, hubani dolog na binangkuhon-Ni marhitei tangan-Ni siamun.

55Iusir do hun lobei ni sidea bangsa sipajuh begu-begu, ibagihon do tanoh pusaka bani sidea, anjaha sagala marga ni Israel ibahen do marianan bani lampolampo ni sidea.

56Tapi ilajou sidea do use Naibata, anjaha iimbang Na Tang Sitimbulan in, anjaha seng iramotkon hasaksian-Ni.

57Marbalik do sidea, mosei songon ompung ni sidea, mubah do sidea songon sior panipu.

58Iparoh sidea do ringis-Ni marhitei buntu-buntu panombahan ni sidea, ipatubuh do simburu-Ni marhitei gana-gana ni sidea.

59Ibogei Naibata ma ai, gabe marah ma Ia, iambukkon ma ganup Israel.

60Ipahalong ma rumah-Ni i Silo, ai ma ianan-Ni i tongah-tongah ni jolma.

61Ilopas do hagogohon-Ni tartaban, anjaha iondoskon hajagaron-Ni bani tangan ni imbang-Ni.

62Iondoskon do bangsa-Ni bani podang, anjaha marah do Ia bani bangsa niain-Ni.

63Anak garama ni sidea bois ipangan apuy, seng dong be na mandoding-doding bani boru ni sidea.

64Rasei do malim ni sidea ibahen podang, anjaha na mangkabaluhon sidea seng tangis be.

65Jadi puho ma Tuhan songon humbani na modom, songon puanglima na tarjolma humbani na minum anggur.

66Manginsurut do imbang-Ni ibogbog, anjaha bador sidea ibahen sadokah ni dokahni.

67Iambukkon do lampolampo ni si Josep, anjaha seng ipilih marga Efraim.

68Tapi marga Juda do ipilih, Dolog Sion na hinaholongan-Ni ai,

69Ipajongjong do ianan-Ni na pansing in songon gijang ni langit, songon tanoh, na pinajonam-Ni sadokah ni dokahni.

70Ipilih do si Daud, juakjuak-Ni ai, ibuat do ia humbani na marmahan biribiri.

71Humbani na mangala-alai biribiri na inuman ialop ia, laho marmahan Jakob bangsa-Ni in, pakon Israel parbagianan-Ni.

72Jadi iparmahan ma sidea humbani pintor ni uhurni, anjaha ibobahon sidea marhitei hapentaran ni tanganni.


  Share Facebook  |  Share Twitter

 <<  Mazmur 78 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel