Dual PanelTangis-tangis ni Bangsa na Tarpisat
1Psalm humbani si Asap. Ham Naibata, domma imasuki sipajuh begu-begu tanoh pusaka-Mu domma ibutaki sidea rumah panumbahan-Mu na pansing in, domma marumbak Jerusalem ibahen.
2Ipamberehon sidea do bangkei ni juakjuak-Mu panganon ni manuk-manuk na i awang-awang, anjaha daging ni hinaholongan-Mu bani binatang harangan.
3Ipanduruskon do daroh ni sidea songon bah inggot Jerusalem, anjaha sahalak pe lang dong na mananomsi.
4Gabe habadoron do hanami bani bangsa simbalognami, gabe hahirion pakon siapason bani halak na manginggoti hanami.
5Sadiha dokah nari, Ham Jahowa, manggila Ham lalab, anjaha marjimbur-jimbur gila-Mu songon apuy?
6Useihon Ham ma ringis-Mu bani sipajuh begu-begu, na so mananda Ham ampa harajaon na so mandilo goran-Mu!
7Ai domma itolon sidea si Jakob, anjaha iparseda iananni.
8Ulang ma hira Ham bennami hajahaton ni na lobeinami! Podas ma idop ni uhur-Mu tongoskon Ham manjumpahkon hanami, ai mandatei tumang do hanami.
9Sai urupi Ham ma hanami, Ham Naibata ni haluahonnami, halani hamuliaon ni goran-Mu! Paluah Ham ma hanami, sasap Ham ma dousanami halani goran-Mu!
10Mase ma hatahonon ni sipajuh begu-begu, “Ija do Naibata ni sidea?” Pabotohkon Ham ma bani sipajuh begu-begu i lobei ni matanami pambalason bani daroh ni juakjuak-Mu, na niduruskon in.
11Sai das ma hu lobei-Mu doruh-doruh ni na tartaban, romban hubani hagogohon ni tangan-Mu paturut Ham ma manggoluh na sahira bunuhon hinan.
12Balas Ham ma hubani bangsa simbalognami, pitu hali lompit bani abingan ni sidea, apas-apas na niapaskon ni sidea Bamu, Ham Tuhan.
13Tapi anggo hanami, bangsa-Mu ampa biribiri na pinarmahan-Mu, sai Ham do pujionnami sadokah ni dokahni, anjaha baritahononnami do puji-pujian Bamu, marsundut-sundut.