Dual PanelHatuahon ni Halak na Marianan i rumah ni Naibata
1Bani pambobai koor. Marhasoman Gitit. Humbani ginompar ni si Korah. Sada Psalm. (84-2) Jenges ni in rumah ianan-Mu, Ham Jahowa Zebaot!
2(84-3) Masihol anjaha ayak do tonduyhu bani alaman ni Jahowa. Marolob-olob do uhurhu pakon dagingku manjumpahkon Naibata na manggoluh in.
3(84-4) Dingis pe jumpahan jabu do, sonai layang-layang dapotan asar do, bahen ianan ni anakni ilambung ni anjapanjap-Mu. Ham Jahowa Zebaot, Rajangku anjaha Naibatangku.
4(84-5) Martuah do halak na marianan i rumah-Mu, sai Ham do pujion ni sidea. Sela.
5(84-6) Martuah do halak, na marhagogohon ibagas Ham, na marugas laho hu rumah-Mu.
6(84-7) Anggo ibolus sidea lombang Baka, gabe ianan bah tubuh do ai bani sidea; tongon, udan mula-mula do na mangarbahisi.
7(84-8) Lambin ganda do gogoh ni sidea, paima das sidea hu lobei ni Naibata i Sion.
8(84-9) Ham Jahowa Zebaot, tangihon Ham ma tonggongku, paeleng Ham na pinggol-Mu, Ham Naibata ni si Jakob. Sela.
9(84-10) Kawahkon Ham ma gantarnami, ale Naibata, anjaha tatap Ham ma bohi ni na mininakan-Mu!
10(84-11) Tongon, dearan do sadari i alaman-Mu ase saribu ari bani ianan na legan; rahanan do sijaga labah ahu i rumah ni Naibatangku ase marianan i lampolampo ni parjahat.
11(84-12) Ai mata ni ari ampa gantar do Naibata Jahowa; Ia do sibere idop ni uhur ampa hasangapon; seng iampogi na madear bani halak na bujur marparlahou.
12(84-13) Ham Jahowa Zebaot, martuah do jolma na marhatengeran Bamu.