Dual PanelTonggo bani Panorang Hasosakan
1Tonggo ni si Daud. Paeleng Ham ma pinggol-Mu, Ham Jahowa, balosi Ham ma ahu, ai doyuk janah sombuh do ahu.
2Ramotkon Ham ma tonduyhu, ai na daulat do ahu. Sai paluah Ham ma juakjuak-Mu na martenger ni uhur hu Bamu!
3Ham do Naibatangku idop ma uhur-Mu bangku, ai hu Bamu do ahu dilo-dilo ganup ari.
4Sai pamalas Ham ma uhur ni juakjuak-Mu, ai hu Bamu do Tuhan, hudompakkon tonduyhu.
5Ai pardear layak do Ham, Tuhan, anjaha marpangulaki do uhur-Mu, buei do idop ni uhur-Mu bani haganup na mandilo Ham.
6Tangihon Ham ma, ale Jahowa, tonggongku, anjaha pardiateihon Ham ma elek-elekku.
7Bani panorang hasosakanku, sai Ham do hudilo, ai ibalosi Ham do ahu.
8Seng dong na doskon Ham i tongah-tongah ni naibata-naibata, Ham Tuhan, anjaha seng dong na doskon pambahenan-Mu.
9Sai roh do sagala bangsa, na jinadihon-Mu; marsombah do sidea hu lobei-Mu, Ham Tuhan, anjaha pasangapon ni sidea do goran-Mu.
10Ai timbul do Ham, sibahen halongangan, pitah Ham do Naibata hansa.
11Sai ajarhon Ham ma dalan-Mu hu bangku, Ham Jahowa, ase mardalan ahu ibagas hasintongan-Mu; sai pabulat Ham ma uhurhu laho mangkabiari goran-Mu.
12Ham Tuhan Naibatangku, sihol do pujionku Ham humbani gok ni uhurhu, anjaha pasangaponku goran-Mu sadokah ni dokahni.
13Ai banggal do idop ni uhur-Mu bangku, ipaluah Ham do ahu humbani nagori toruh.
14Ham Naibata, roh do na jungkat maruhur mangimbang ahu, hulanan ni parjahat sihol mamunuh ahu, seng parduli sidea Bamu.
15Tapi Ham do Tuhan, Naibata paridop ni uhur janah parholong, Ham, na lambat manringis, parontou ni uhur banggal janah parsintong.
16Dompakkon Ham ma ahu anjaha maidop uhur-Mu bangku. Bere Ham ma gogoh-Mu bani juakjuak-Mu, anjaha paluah Ham ma anak ni jabolon-Mu naboru.
17Bahen Ham ma bangku tanda hadearon, ase maila halak sidomdomi ahu, mangidah na dob iurupi anjaha iapohi Ham ahu, Ham Jahowa.