Dual PanelPuji-pujian bani Jahowa halani hapintoron-Ni
1Sada Psalm. Doding bani Ari Sabat. (92-2) Na madear do mamuji Jahowa ampa mandodingkon goran-Mu, Ham ale Sitimbulan,
2(92-3) mangambilankon idop ni uhur-Mu sogod ampa hasintongan-Mu borngin,
3(92-4) marhasoman parugas sisapuluh tali pakon arbap, iirikkon sora ni husapi.
4(92-5) Ai ipamalas Ham do uhurhu, Ham Jahowa marhitei pambahenan-Mu, marolob-olob do ahu mangidah jadi-jadian ni tangan-Mu.
5(92-6) Banggal ni in pambahenan-Mu, Ham Jahowa, bagas tumang do pingkiran-Mu.
6(92-7) Jolma na bodoh seng iarusi anjaha jolma na lontong seng iartihon ai.
7(92-8) Age pe martumbor parjahat songon poyon-poyon, anjaha marbunga sagala sihorjahon na masambor, sisedahonon do sidea sadokah ni dokahni.
8(92-9) Tapi anggo Ham, ale Jahowa, timbul do ronsi sadokah ni dokahni.
9(92-10) Tongon, munsuh-Mu, Ham Jahowa, tongon, munsuh-Mu magou do; mambur merap do sagala sihorjahon hajahaton.
10(92-11) Tapi ipagijang Ham do tandukku songon tanduk ni ursa, iminaki Ham do ahu bani minak na bayu;
11(92-12) sombuh do matangku mangidah pardabuh ni munsuhku, anjaha megah pinggolhu manangar parmagou ni siimbang ahu.
12(92-13) Halak parpintor martumbor do songon kurma, anjaha martunas songon hayu ares i Libanon.
13(92-14) Sidea na sinuan i rumah ni Jahowa, sai marbunga do sidea bani alaman ni Naibatanta;
14(92-15) marbuah do sidea age dob matua, tongtong tabun anjaha maratah,
15(92-16) laho mangambilankon, “Pintor do Jahowa, Batu Ginggingku, anjaha seng dong hagedukon Bani.”