Dual PanelPuji-pujian bani Jahowa, Raja Siuhum Tanoh on
1Dodingkon nasiam ma sada doding na bayu bani Jahowa, dodingkon nasiam ma Jahowa, ale ganup tanoh on!
2Dodingkon nasiam ma Jahowa, puji ma goran-Ni; ambilankon nasiam ma hatuahon-Ni, ganup ari!
3Baritahon nasiam ma i tongah-tongah ni sipajuh begu-begu hamuliaon-Ni, i tongah-tongah ni bangsa-bangsa halongangan binahen-Ni ai.
4Ai banggal do Jahowa, talup tumang sipujion, marjumbalang do Ia i atas ni sagala naibata.
5Ai na lang do naibata ni bangsa-bangsa, tapi Jahowa do sijadihon langit.
6Hasangapon ampa hamuliaon do i lobei-Ni, hagogohon pakon hatunggungon do bani ianan-Ni na ma pansing in.
7Bere nasiam ma bani Jahowa, ale bangsa-bangsa, bere nasiam ma bani Jahowa hamuliaon pakon hagogohon.
8Bere nasiam ma bani Jahowa hamuliaon ni goran-Ni, boan nasiam ma galangan, masuk ma nasiam bani alaman-Ni!
9Manrogop ma nasiam i lobei ni Jahowa marpakeian na ma pansing, hitir-hitir ma i lobei-Ni, ale ganup tanoh on!
10Hatahon ma i tongah ni bangsa parbegu, “Jahowa do Raja; Ia do na pajonamkon dunia on, seng anjai dugur; uhumon-Ni do sagala bangsa ibagas hapintoron.”
11Marmalas ni uhur ma langit anjaha marolob-olob ma tanoh on, marhasak ma laut pakon pangisini.
12Marmalas ni uhur ma ladang ampa ganup na ijai, age sagala hayu na i harangan marolob-olob ma,
13i lobei ni Jahowa, ai tongon roh ma Ia manguhum tanoh on. Uhumon-Ni ma dunia on ibagas hapintoron ampa bangsa-bangsa ibagas hasintongan-Ni.