Dual PanelRaja na Marjumbalang do Jahowa
1Jahowa do Raja. Marsurak-surak ma tanoh on, marmalas ni uhur ma sagala pulou!
2Hombun ampa na golap marimpot-impot do manginggoti-Si, hapintoron pakon uhum do onjolan ni hotak-Ni.
3Mardalan do apuy i lobei-Ni, laho mamboiskon imbang-Ni inggot.
4Hilap-Ni do manondangi dunia on, ididah tanoh ma ai gabe dugur.
5Dolog-dolog malala songon lilin i lobei ni Jahowa, i lobei ni Tuhan ni sab tanoh on.
6Langit mangambilankon hapintoron-Ni, anjaha sagala bangsa mangidah hamuliaon-Ni.
7Maila do sagala sisombah gana-gana, halak na marmogah-mogah bani sisombahonni; ningon marsombah Bani do sagala naibata-naibata.
8Mambogei ai marmalas ni uhur ma Sion, marolob-olob boru Juda, halani panguhum-Mu, ale Jahowa.
9Ai Ham do, ale Jahowa, Sitimbulan i atas ni sab tanoh on. Gijang tumang do Ham i atas ni sagala naibata.
10Ihaholongi Jahowa do na mangkagigihon na masambor. Ia do na manramotkon tonduy ni na hinaholongan-Ni, anjaha ipaluah do sidea humbani tangan ni parjahat.
11Marsinalsal do na lihar bani halak parpintor, anjaha malas ni uhur bani sibujur uhur.
12Marmalas ni uhur na nasiam, ale parpintor, ibagas Jahowa, anjaha puji nasiam ma goran-Ni na pansing in.