Dual PanelPambalason ni Naibata bani Munsuh-Ni
1Panjahaion Pasal Ninive. Buku Pangungkabon ni si Nahum, halak Elkos ai.
2Naibata parsimburu anjaha pambalas do Jahowa; sipambalas do Jahowa anjaha parringis tumang. Sipambalas do Jahowa dompak imbang-Ni, anjaha totap manggila dompak munsuh-Ni.
3Tongon nanget do Jahowa manringis anjaha paridop ni uhur banggal, tapi sai na marlulu do Ia. Marhasoman habahaba ampa halisungsung do Ia mardalan. anjaha hombun do orbuk ni nahei-Ni.
4Mangonai hata Ia bani laut, gabe horah do, anjaha ipahorah do ganup bah mardalan. Horah do Basan ampa Karmel, anjaha melus bunga ni Libanon.
5Dugur do dolog i lobei-Ni anjaha malala buntu-buntu; gobir do tanoh on i lobei-Ni, dunia on ampa haganup isini.
6Ise ma na tahan jongjong mandompakkon gajag ni gila-Ni? Ise ma na pag manjumpahkon gara ni ringis-Ni? Marjimbur-jimbur do songon apuy gila-Ni, anjaha mangkatorban dolog batu i lobei-Ni.
7Pardear layak do Jahowa, benteng bani panorang hasosakan; anjaha itanda do na marhaporusan Bani.
8Tapi marhitei bah na sumbang siap tumang do ibahen na mangimbang-Si anjaha idakdaki do munsuh-Ni hubagas na golap.
9Aha do na tinahi ni uhurnima dompak Jahowa? Siap tumang do ai bahenon-Ni, seng pala dua hali timbul hasosakan.
10Songon suga-suga na itagili bois sidea, songon anggala na horah tene mosog sidea.
11Ai lang hun tongah-tongahmu do luar halak na manguhurhon hajahaton dompak Jahowa, halak na manranggihon na masambor tumang?
12Sonon do hata ni Jahowa, “Age pe gogoh anjaha buei sidea, maningon sabion do sidea ase masab sidea. Age pe domma Hupatoruh ho, seng be patoruhon-Ku ho.
13Sonari pe buaton anjaha ponggolhonon-Ku ma pasanganmu humbam, anjaha rotapon-Ku ma garimu.
14Tapi dompak ho iparentahkon Jahowa do, ʻSeng be patotapon goranmu; hun rumah ni naibatamu siapkonon-Ku ma gana-gana na niuhir ampa gana-gana na tinuang: Ahu do na pasirsirhon tanomanmu, ai siambukkonon do ho.ʼ”
Haluahon ni Israel ampa Parseda ni Ninive
15(2-1) Tonggor ma, i atas ni dolog nahei ni siboan Ambilan Na Madear, na maningtingkon damei! Pestahon pestamu ale Juda, galari bagah-bagahmu, ai seng anjai roh be parjahat mangimbang ho, domma siap botul ia.