Dual PanelSi Nehemia Isuruh Raja Artasasta Laho hu Jerusalem
1Bani bulan Nisan, paduapuluh-tahunkon dob manrajai Raja Artasasta, tudu sanggah adong anggur i lobeini, hubuat ma anggur ai anjaha hubere ma hubani raja ai. Seng ongga pusok uhurhu na saindokah i lobeini.
2Dob ai nini raja ai ma hu bangku, “Mase sai pusok idahon bohimu? Ai boritan ho?” Domma torang naborit ni uhur do on. Jadi mabiar tumang ma ahu.
3Ningku ma dompak raja ai, “Sai manggoluh ma raja in ronsi sadokah ni dokahni. Mase ma lang pusok uhurhu, anggo maseda huta, ianan ni tanoman ni ompung diri, anjaha horbanganni maseda ibahen apuy.”
4Dob ai nini raja ai ma hu bangku, “Ai aha gakni pangindoanmu?” Jadi martonggo ma ahu hubani Naibata na i surga.
5Dob ai ningku ma hubani raja ai, “Anggo dear ninuhur ni raja in, anjaha jumpahan idop ni uhur juakjuakmu i lobeimu, suruh ham ma ahu hu Juda, hu huta ianan ni tanoman ni ompung, ase hupauli ai.”
6Dob ai nini raja ai ma hu bangku, anjaha puangbolon tudu hundul i lambungni, “Sadiha dokah gakni pardalananmai anjaha antigan ho boi mulak?” Jadi iharosuhkon raja ai ma marsuruh ahu, dob hutotapkon panorangni bani.
7Tapi ningku ma dompak raja ai, “Anggo dear uhur ni raja in, ibere ma namin hu bangku surat-surat siboanonku hubani panrajai na i dipar ni bah banggal, ase ipalopas sidea ahu montas, paima das ahu hu Juda.
8Ambah ni ai sada surat hubani si Asap, sijaga harangan ni raja in, ase ibere hu bangku hayu bahen tutup tiang ni horbangan ni benteng ni rumah panumbahan ai pakon bahen parhayu ni rumah siiananku.” Dob ai ibere raja ai ma hu bangku na hupindo ai, ai tangan ni Naibata na layak ai do i babouhu.
9Dob ai das ma ahu hubani panrajai na i dipar ni bah banggal, jadi hubere ma bani sidea surat ni raja ai. Marhasoman pambobai ni bala pakon siajak huda hinan ahu ipabingkat raja ai.
10Tapi dob ibogei si Sanballat, halak Horoni ai, pakon si Tobia, juakjuak ai, ai ma halak Amon, barita ai, sogam tumang ma uhur ni sidea, halani roh sada halak, laho mansarihon hadoharon ni halak Israel.
Ipungkah si Nehemia Horjani i Jerusalem
11Jadi das ma ahu i Jerusalem. Dob adong tolu ari ahu ijai,
12marugas ma ahu bornginni ai rap pakon piga-piga dalahi; tapi bani ise pe lang hupatugah na ninahkon ni Naibata ai hubagas uhurhu, na sihol bahenonku hu Jerusalem. Seng dong pinahan bangku age sada sobali na huhunduli ai.
13Dob ai luar ma ahu bornginni ai hun horbangan habungan laho hu parigi naga ampa hu horbangan parnapuan, anjaha hupareksa ma tembok ni Jerusalem, na dob pinarreong ampa horbanganni, na dob maseda ibahen apuy.
14Dob ai hutoruskon ma hu horbangan bah tubuh pakon hu bongbongan ni raja ai. Tapi sungkod do hudangkai mardalan, anggo i atas ahu.
15Lanjar borngin ni ai do ahu tangkog hun habungan ai laho mamareksa tembok ai; dob ai mulak ma ahu anjaha das use hu huta manlopusi horbangan habungan ai.
16Tapi seng ibotoh pangintuai-pangintuai ai, barang huja ahu na laho ai atap aha na hubahen ai; ai seng hupatugah ope ai hubani halak Jahudi, malim, halak na sangap, pangintuai ampa hubani halak na legan, ai ma sihorjahon horja ai.
17Dob ai ningku ma dompak sidea, “Domma ididah nasiam hasunsahan na mangonai banta, ai ma sonaha parrumbak ni Jerusalem anjaha horbanganni pe mosog do. Laita, pajongjong hita ma use tembok ni Jerusalem, ase ulang madorun be hita.”
18Dob ai hubaritahon ma bani sidea naha panogu-nogu ni tangan ni Naibata na layak in bangku, sonai homa hata ni raja ai, na hinatahonni bangku. Jadi nini sidea ma, “Marugas ma hita paulihon!” Jadi marsipagogoh tanganni bei ma sidea mangkorjahon horja na madear ai.
19Tapi dob itangar si Sanballat, halak Horoni ai, pakon si Tobia, juakjuak, halak Amon ai, pakon si Gesem halak Arab ai, barita ai, manrisai anjaha marmapas ni uhur ma sidea bennami, nini sidea ma, “Aha do na binahennima in? Na manggeori do hanima dompak raja in?”
20Tapi ningku ma dompak sidea, “Naibata na i surga, Ia do na manumpaki hanami pasaudkon on, anjaha hanami, jabolon-Ni, marugas ma hanami, laho pajongjongkon; tapi anggo nasiam, seng dong marbagian barang marhak barang marpardingatan i Jerusalem.”