Dual PanelGolpa-golpa bani Jolma, ase Idingat na Manompasi Paima Roh Panorang Matua ampa Hamatean
1Ingat ma Sitompa ho bani ari haposoonmu, paima lape roh ari na masambor, anjaha lape das panorangni, hatahononmu holi ijai, “Seng marosuh be ahu pasal in!”
2Paima lape golap mata ni ari ampa na lihar, bulan ampa bintang-bintang, anjaha mulak manorap hombun dob salpu udan.
3Ai bani panorang ai holi hitir-hitir ma si jaga rumah, anjaha gundung dalahi-dalahi na margogoh, maronti si panduda manduda, ai otik mando sidea tading, anjaha gombur ma si pangkawah humbani jandela;
4tartutup ma homa na dua labah na dompak alaman ai, anjaha lambin nangetni sora ni losung; masihil ma sora songon sora ni manuk-manuk, anjaha surut ma homa sipandoding;
5mabiar do bani dalan tangkog, anjaha gobir i tongah dalan; marurus ma homa bunga na lopak ai humbani untei hasumba, anjaha borat manlangkah balang, sir ni uhur pe miloh ma. Ai laho ma jolma in marayak rumahni sisadokah ni dokahni, anjaha halak si panangisi pe domma marodor i alaman.
6Paima rotap tali pirak ai anjaha matapor batil omas ai; paima lape mabolah gusi i lambung ni bah tubuh anjaha marosak tahu-tahu na i sumur;
7paima mulak orbuk ai hu tanoh, pambuatanni hinan, anjaha tonduy ai mulak hubani Naibata, na mamberehon ai hinan.
8Sisoya-soya do tongon, nini Parambilan ai, sisoya-soya do haganup.
Hata Panutup Pasal Buku Parambilan
9Ambah ni na pentar Parambilan ai, iajarhon do homa habotohon hubani halak na mabuei; itimbang anjaha ipareksa anjaha ibahen do buei podah.
10Ipindahi Parambilan ai do hata na sangkan, anjaha sintong do isuratkon hata hasintongan ai.
11Hata ni halak na pentar songon lonsing-lonsing do, anjaha songon paku na ipakuhon do podah na ipatumpu ai; marhitei sada parmahan do iberehon ai.
12Ambah ni ai, ale anakku, sai ra ma ho paingaton! Seng ra maronti na mambahen buku-buku, anjaha halojaon ni angkula do buei marlajar.
13Pangibulan ni haganup na dob binogei ai, “Habiari ma Naibata, anjaha dalankon ma titah-Ni, ai do hawajiban ni ganup jolma.
14Ai boanon ni Naibata do sagala pambahenan hu paruhuman, haganup na ponop, na dear atap na sambor pe ai.”