Dual PanelGalangan Pardearan hubani Naibata halani Pamunuhon na So Binotoh humbani Sada Halak
1Anggo jumpah sada halak na matei hona bogbog i tanoh sibereon ni Jahowa Naibatamu bamu bahen parbagiananmu, toltol i ladang, seng na botoh barang ise na mamunuhsi,
2maningon luar ma pangintuai pakon panguhummu, laho manibar sadiha daohni halak na matei hona bogbog ai hun huta na inggot hujai.
3Jadi barang huta ja sidohoran hubani na matei ai, maningon buaton ni pangintuai ni huta ai ma sada anak ni lombu, na so ongga ope pinakei maninggala, anjaha na so ongga ope hatampean ni pasangan.
4Dob ai maningon boanon ni pangituai ni huta ai ma anak ni lombu ai tuad hu sada habungan na tongtong marnah bah, na so ongga hinorjahon barang nitidahan, anjaha maningon ponggolhononkon ma ijai, i habungan ai, borgok ni anak ni lombu ai.
5Dob ai maningon roh ma hun dohor malim ginompar ni halak Levi, ai domma ipilih Jahowa Naibatamu sidea gabe siparugas Bani, pakon mamasu-masu marhitei goran ni Jahowa, anjaha marguru hubani pangkatahon ni sidea do marhaujungan sagala parsalisihan pakon sagala na marsitobakan.
6Anjaha sagala pangintuai ni huta ai, sidohoran hubani halak na binunuh ai, maningon burihan ni sidea do tangan ni sidea i atas ni lombu, na pinonggolhon ai borgokni i habungan ia,
7anjaha maningon saksihonon ni sidea do, “Seng tangannami manduruskon daroh on, anjaha seng ididah matanami on.”
8Gabe pardearan ma on, bani bangsamu halak Israel, na dob tinobusmu alo Jahowa! Sai ulang ma marsapata daroh na so marpipot in i tongah-tongah ni bangsamu halak Israel! Jadi dapotan pardearan ma sidea marhalanihon ni daroh ai.
9Sonai ma pamurpurhonmu bani sapata ni daroh, na so marpipot ai hun tongah-tongahmu, anggo ihorjahon ham na sintong i lobei ni Jahowa.
Pasal Naboru na Tartangkap i Parporangan
10Anggo bingkat ham laho marporang dompak munsuhmu, anjaha iondoskon Jahowa Naibatamu sidea hubagas tanganmu, gabe adong tarboan humbani sidea ibahen ham,
11jadi ididah ham i tongah-tongah ni na tarboan ai sada naboru, na jenges rupa gabe marosuh ham mangidahsi, anjaha sihol buatonmu ia gabe parinangonmu,
12jadi maningon boanonmu ia masuk hu rumahmu, maningon suhuronni uluni anjaha buatonni sisilonni,
13maningon tanggalonni hiou na pinakeini sanggah na tarboan ai ia, anjaha marianan ma ia i rumahmu, anjaha tangisanni ma bapani pakon inangni sabulan dokahni, dob ai bulih ma parayakonmu ia, gabe paramangonni, anjaha ia gabe parinangonmu.
14Tapi anggo seng be marosuh uhurmu mangidahsi, maningon palahoonmu do ia huja rosuh ni uhurni; seng bulih jualonmu ia barang parjabolononmu ia, halani na dob marsaor ham hu bani.
Pasal Hak Sikahanan
15Anggo mardua binuat sada halak, na sada ihaholongi anjaha na sada nari ihagigihon, gabe tubuhan tuah ia humbani sidea na dua ai, na hinaholongan pakon hinagigihonni ai, anjaha na hinagigihon ai do tudu simada anak bunga tubuh ai,
16jadi bani ari pamberehononni bani tean-teanan tinadingkonni ai bani anakni ai, seng bulih pabangkitonni gabe bunga tubuhni anak ni na hinaholonganni ai gantih ni anak bunga tubuh ni na hinagigihonni ai,
17maningon akuonni do anak bunga tubuh ni na hinagigihonni ai anak bunga tubuhni, marhitei na mamberehon bani dua bagian humbani ganup na dong bani, ai ia do limbuah ni hagogohonni, ia do simada hak sikahanan.
Uhum bani Anak na So Mambalosi Ajar
18Anggo adong bani sada halak anak na jungkat anjaha na tarboan-boan uhurni, na so manangihon sora ni bapani barang sora ni inangni, anjaha iajari sidea pe ia, lanjar seng itangihon sidea,
19maningon tangkapon ni bapani pakon inangni ma ia, anjaha boanonni ma ia luar hu lobei ni pangintuai ni huta ai, bani horbangan ni huta iananni ai,
20anjaha nini ma dompak pangintuai ni huta ai, “Anaknami on jungkat, anjaha tarboan-boan uhurni, seng itangihon hatanami, sipapangan magou anjaha siparinum.”
21Jadi maningon pargijigon ni sagala dalahi parhuta ai ma ia bani batu ase matei; maningon sonai siapkononmu hajahaton ai hun tongah-tongahmu; jadi ganup ma halak Israel mambogei ai, gabe mabiar.
Pananomon bani Halak na Iuhum Matei
22Anggo mardousa sada halak, anjaha patut ia marutang hosah, gabe saud ia ibunuh, anjaha igantungkon ham ia bani sada hayu,
23seng bulih marborngin bangkei ni ai i atas hayu ai, maningon tanomonmu do ia bani na sadari ai, ai na hona papa ni Naibata do halak na targantung; seng bulih pabutakonmu tanoh na binere ni Jahowa Naibatamu bamu bahen parbagiananmu.