Alkitab Mobile SABDA
[VER] : [SIMALUNGUN]     [PL]  [PB] 
 <<  Yehezkiel 11 >> 

Uhum hubani Sipambobai na Tading i Jerusalem

1Anjaha iangkat Tonduy ai ma ahu, anjaha iboban ma ahu hu horbangan Parhapoltakan ni rumah ni Jahowa. Anjaha tonggor ma, i labah ni horbangan ai, adong do dua puluh lima halak dalahi; anjaha huidah do i tongah-tongah ni sidea si Jeasanya, anak ni si Assur, ampa si Pelatya, anak ni si Benaya, ai ma kopala-kopala ni bangsa ai.

2Jadi nini ma hu bangku, “Ale anak ni jolma, on ma halak na manranggi hajahaton ampa na mambere podah na masambor ibagas huta on.

3Nini sidea, ʻAi lang baru ope ipajongjong rumah? Huta on do hudon ai, hita do gulei ai.ʼ

4Halani ai manjahai ma ho dompak sidea, manjahai ma, ale anak ni jolma!”

5Jadi sogop ma hu bangku Tonduy ni Jahowa, anjaha nini ma dompak ahu, “Hatahon ma, sonon do hata ni Jahowa, sonai do ihatahon hanima, ale ginompar ni Israel, ai Hubotoh do na dong tubuh ibagas uhurnima.

6Ipabuei hanima do jolma na tarbunuh ibagas huta on, anjaha igoki hanima do dalan-dalanni ai bani halak na binunuh.”

7Halani ai sonon do hata ni Tuhan Jahowa, “Jolma na binunuhnima, na niraseihonnima i tongah-tongah ni huta in, sidea ma juhut ai, anjaha huta on ma hudon ai; tapi anggo hanima boanon-Ku do mandarat hun tongah-tongahni ai.

8Mabiar do hanima bani podang, jadi podang do parohon-Ku bannima,” nini Tuhan Jahowa.

9“Anjaha padaraton-Ku do hanima hun tongah-tongah ni huta in, anjaha ondoskonon-Ku do hanima hubagas tangan ni halak na legan, anjaha pasogopon-Ku do uhum bannima.

10Boiskonon ni podang do hanima; uhumon-Ku do hanima bani parbalogan ni Israel; jadi botohonnima ma, Ahu do Jahowa.

11Seng gabe hudon huta ai bannima, anjaha seng hanima gabe juhut ibagas; bani parbalogan ni Israel do uhumon-Ku hanima.

12Jadi botohonnima ma, Ahu do Jahowa, ai seng idalankon hanima titah-Ku anjaha seng ihorjahon hanima parentah-Ku, tapi marparlahou do hanima songon bangsa-bangsa na inggot bannima.”

13Jadi masa ma, sanggah manjahai ahu, matei ma si Pelaca, anak ni si Benaya. Manrogop ma ahu, hupamaling ma sorangku, anjaha ningku ma, “Ham Tuhan Jahowa, ai boiskonon-Mu do teba-teba ni bangsa Israel in?”

Bagah-bagah hu bani Halak na dob Tarbuang

14Dob ai roh ma hata ni Jahowa hu bangku, mangkatahon,

15“Ho ale anak ni jolma, saninamu haganup, hasomanmu samarga ampa halak Israel haganup, sonon do pangkatahon ni pangisi ni Jerusalem pasal sidea, ʻDomma daoh sidea humbani Jahowa; hu banta do iberehon tanoh on gabe parbagiananta.ʼ

16Halani ai hatahon ma, sonon do hata ni Tuhan Jahowa, ʻTongon, Ahu do mambuangkon sidea hu tongah-tongah ni bangsa-bangsa, anjaha Ahu do mangerap sidea hu nagori-nagori ai, tapi Ahu do gabe ianan hapansingon i nagori hamerapan ni sidea ai.ʼ

17Halani ai hatahon ma, sonon do hata ni Tuhan Jahowa, ʻPatumpuon-Ku do use sidea humbani bangsa-bangsa ai, anjaha pahumpulon-Ku do sidea humbani nagori hamerapan ni sidea ai, anjaha berehonon-Ku do tanoh Israel bani sidea.

18Anjaha dob das sidea ijai, padaohon ni sidea ma hunjai sagala hagigi ampa sagala hasamboron.

19Jadi berehonon-Ku ma bani sidea uhur na sada, anjaha nahkonon-Ku do tonduy na bayu hubagas sidea; padaohon-Ku do uhur batu humbani daging ni sidea, anjaha berehonon-Ku do bani sidea uhur na marpangahapan,

20ase marparlahou sidea ibagas titah-Ku, iramotkon aturan-Ku anjaha idalankon; gabe bangsang-Ku ma sidea anjaha Ahu gabe Naibata ni sidea.

21Tapi sidea, na marosuh ni uhur bani hagigi ampa na masambor, balaskonon-Ku do bani ulu ni sidea pambahenan ni sidea ai,ʼ” nini Tuhan Jahowa.

Parmisir ni Hamuliaon ni Jahowa hun Jerusalem

22Dob ai ipaherbang herubim ai ma habong ni sidea, anjaha mangihut do galapang na i lambung ni sidea ai, anjaha hamuliaon ni Jahowa do i atas ni sidea.

23Jadi naik ma hamuliaon ni Jahowa hun tongah-tongah ni huta ai, anjaha sogop ma i atas ni dolog na hampit hapoltakan ni huta ai.

24Anjaha iangkat Tonduy ai ma ahu, anjaha iboan ma ahu ibagas panonggoran marhitei Tonduy ni Naibata hu tanoh ni halak Kasdim, hubani na tarbuang ai. Dob ai laho ma panonggoran na huidah ai humbangku.

25Jadi huhatahon ma bani na tarbuang ai haganup hata ni Jahowa, na pinatalarni ai hu bangku.


  Share Facebook  |  Share Twitter

 <<  Yehezkiel 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel