Alkitab Mobile SABDA
[VER] : [SIMALUNGUN]     [PL]  [PB] 
 <<  Yehezkiel 23 >> 

Limbaga Pasal Habutakon ni Samaria ampa Jerusalem na Marsanina ai

1Dob ai roh ma hata ni Jahowa hu bangku, mangkatahon,

2“Ale anak ni jolma, adong ma dua naboru, sisada inang do sidea.

3Marriah-riah do sidea i Masir; marriah-riah do sidea sanggah poso; ipaturut do hona pisatan bagod-bagod ni sidea, ipaturut idadapi tontonni bani haposoonni.

4Goran ni naboru sikahanan ai si Ohola, goran ni sianggian ai si Oholiba. Jadi Ahu ma simada sidea haduasi, tubuhan anak tubuhan boru ma sidea. Arti ni goran ni sidea ai: si Ohola, ai ma Samaria, anjaha si Oholiba, ai ma Jerusalem.

5Marriah-riahi do si Ohola sanggah Ahu ope simadasi; oji tumang do uhurni bani na mangkarosuhkonsi, ai ma halak Assur, na mandohorisi ai,

6ai ma na sangap-sangap parhiou sitora, sipanrajai ampa puanglima; haganup sidea poso anjaha majenges, sipangajak huda.

7Iondoskon do dirini marriah-riah pakon sidea, halak Assur jolma pilihan ai; ipabutak do dirini marhitei gana-gana ni ganup halak ojian ni uhurni ai.

8Seng homa itadingkon parriah-riahonni, na dob nidalankonni sanggah i Masir ope, halani bani haposoonni domma modom halak rap pakonsi, ipisati bagod-bagodni, anjaha ipadas rosuhni hu bani.

9Halani ai, Huondoskon do ia hubani halak na mangkarosuhkonsi, ai ma halak Assur, ojian ni uhurni ai.

10Ipasalang sidea ma ia, irampas anak pakon boruni, anjaha ia ibunuh marhitei podang; gabe umpama do ia i tongah-tongah ni naboru, sanggah idalankon uhum ai bani.

11Age pe ididah si Oholiba, anggini ai, na masa ai, garangan ope ia humbani abangni ai, anjaha samboran ope parriah-riahonni marimbang abangni ai.

12Oji do uhurni bani halak Assur, raja-raja pakon kopala-kopala ni tentara, na mandohorisi ai, na marpakeian na majenges, siajak huda, haganup sidea poso anjaha majenges.

13Jadi Huidah ma hona butakan ia, dos do ulah ni sidea haduasi.

14Tapi inunut do tong parriah-riahonni ai; ididah do dalahi iuhirhon bani tembok, gambaran ni halak Kasdim, na igambar marset sigerger,

15margondit bani binongeini, martudung uluni, ganup sidea songon puanglima idahon; ai ma gambaran ni halak Babel, na marhasusuran i tanoh Kasdim.

16Anggo ididah sidea, oji ma uhurni mangidah sidea, isuruh ma suruhanni marayak sidea hu nagori Kasdim.

17Jadi iparayak halak Babel ma ia, laho rap modom pakonsi, anjaha ibutaki do ia marhitei na marriah-riah; dob ibutaki sidea ia, magigi ma ia mangidah sidea.

18Talar do idalankon parriah-riahonni ai, anjaha ipatidak do hailaonni, jadi magigi ma uhur-Hu mangidahsi, songon gigi ni uhurhu dompak abangni ai.

19Tapi inunut do tong parriah-riahonni, mardingat do ia bani ari haposoonni, na marriah-riah ai ia i tanoh Masir,

20na oji ai uhurni mangidah na mangkarosuhkonsi, na garang ai songon halode ampa songon huda.

21Tongon masihol do uhurmu bani habutakon ni haposoonmu, sanggah na ipisati halak Masir bagodmu anjaha idadapi tontonmu bani haposoonmu.

22Halani ai, ale Oholiba, sonon do hata ni Tuhan Jahowa, Tonggor ma, ojuron-Ku do mangimbang ho na mangkarosuhkon ho ai, na dob hinagigihonmai, anjaha humbani ganup ianan do parohon-Ku sidea manlawan ho,

23ai ma halak Babel ampa ganup halak Kasdim, halak Pekod, Soa pakon Koa, ampa haganup halak Assur na rap pakon sidea, ai ma halak na maposo anjaha majenges, sipanrajai ampa puanglima do sidea ganup, haganup do sidea siajak huda.

24Roh do sidea mandorab ho marhasoman gareta porang pakon gareta ampa marhasoman buei bala; hubuon ni sidea ma ho inggot, marhasoman gantar na banggal pakon na etek ampa tangkuluk bosi. Ondoskonon-Ku ma bani sidea panguhumion ai, jadi uhumon ni sidea ma ho domu hubani uhum ni sidea.

25Dompakkonon-Ku ma bam marah-Ku, jadi padalanon ni sidea ma bam ringis. Sayaton ni sidea ma igungmu ampa pinggolmu, anjaha halak na tading hun bam rasei ibahen podang. Rampason ni sidea ma anakmu pakon borumu, anjaha sagala na tading bam bois ibahen apuy.

26Rintakon ni sidea do pakeian-pakeianmu, anjaha rampason ni sidea ugas-ugasmu.

27Sonai ma parontihonon-Ku habutakonmu ampa parriah-riahonmu, na nidalankonmu hun tanoh Masir nari, ase ulang be kawah matamu dompak sidea anjaha ulang be idingat-dingat ho Masir.”

28Sonon do hata ni Tuhan Jahowa, “Tonggor ma, ondoskonon-Ku do ho hubagas tangan ni halak sogam ni uhurmu, hubagas tangan ni halak na dob hinagigihonmu,

29jadi domdoman ni sidea ma ho, anjaha rampason ni sidea sagala na sinarimu; paturuton ni sidea ma ho talanjang seng marhiou, anjaha talar ma hailaon ni parriah-riahonmu.

30Habutakonmu ampa parriah-riahonmu do na paroh ai bam, halani na marriah-riah ai ho pakon sipajuh begu-begu anjaha ibutaki ho dirimu marhitei gana-gana ni sidea.

31Songon parlahou ni abangmu do parlahoumu, halani ai Hubere do hubam panginuman na niinum ni abangmu.”

32Sonon do hata ni Tuhan Jahowa, “Maningon inumonmu do panginuman ni abangmu na bagas anjaha na banggal ai, sipartatawaan anjaha mahiri ma ho, ai buei do isini ai;

33maningon sirnib do ho ibahen hamabukon ampa pusok ni uhur. Panginuman songgot-songgot ampa hagobiron do panginuman ni abangmu Samaria;

34maningon inumonmu do ai anjaha palumeionmu; maningon haratonmu do posah-posahni, anjaha rarikonmu tontonmu, tongon, Ahu do mangkatahon ai,” nini Tuhan Jahowa.

35Halani ai sonon do hata ni Tuhan Jahowa, “Halani na dob lupa ho Bangku, anjaha iambungkon ho Ahu hu pudimu, halani ai porsan ma upah ni habutakonmu ampa parriah-riahonmu.”

36Nini Jahowa ma hu bangku, “Ale anak ni jolma, sihol do uhumonmu si Ohola pakon si Oholiba? Anggo sonai, patugah ma hubani sidea hasamboron ni sidea.

37Tongon, marbangkis do sidea anjaha sab daroh do tangan ni sidea; rap pakon gana-gana ni sidea ai do sidea marbangkis; anjaha igalangkon do anak ni sidea bahen sipanganon ni gana-gana ni sidea, ai ma anak na tinubuhkon Bangku.

38Ambah ni ai, on ope ibahen sidea Bangku: Ipabutak sidea do ianan-Ku na pansing in bani ari ai, anjaha ipabutak sidea do ari Sabat-Ku.

39Ai dob isayati sidea anak ni sidea bahen galangan hu bani sisombah-sombahon ni sidea ai, bani ari ai do masuk sidea hubagas ianan-Ku na pansing ai laho pabutakkon ai; tonggor ma, sonai do ibahen sidea ibagas rumah-Ku.

40Isuruh do suruhanni mangalopi halak humbani na daoh, anjaha tonggor ma, dob roh sidea, iparidi ho do dirimu, ipajagar ho matamu, anjaha ipakei ho ugas-ugasmu;

41hundul ma ho i atas ni podoman na majenges, meja na dob pinasirsir i lambungni, panampeianmu bani dahupa ampa minak-Ku.

42Lutu do sora ni halak na mabuei i lambungni, ai ma sora ni halak na roh marayaksi hun halimisan; igolangi sidea do tangan ni naboru ai, anjaha inahkon sortali na majenges i atas uluni.

43Jadi ninuhur-Hu ma: Ai mandalankon parbangkison ope naboru na dob melus in? Ai ra ope halak nani marriah-riah pakonsi?

44Tongon, laho do halak marayaksi, songon marayak boru jalang; sonai ma laho sidea marayak si Ohola pakon si Oholiba, laho mandalankon habutakon.

45Tapi uhumon ni halak parpintor do sidea romban hubani uhum bani siparbangkis ampa uhum bani naboru siduruskon daroh, ai siparbangkis do sidea, anjaha gok daroh do tangan ni sidea.”

46Ai sonon do hata ni Tuhan Jahowa, “Ojur ma simbuei manlawan sidea, anjaha bahen ma sidea gabe siarsik-arsikon anjaha sirampason.

47Pargijigon ni simbuei ai ma sidea bani batu, anjaha tampulon ni sidea bani podang ni sidea; bunuhon ni sidea ma anakni pakon boruni, anjaha tutungonni rumahni bani apuy.

48Sonai ma parontihonon-Ku habutakon i nagori in, ase jora sagala naboru, ulang ihorjahon be habutakon, songon na binahen ni sidea ai.

49Sonai ma honahonon-Ku bannima habutakonnima ai, anjaha porsanonnima uhum halani dousanima na marnaibata na legan ai; jadi botohonnima ma, Ahu do Jahowa.”


  Share Facebook  |  Share Twitter

 <<  Yehezkiel 23 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran