Dual PanelPanjahaion Pasal Parroh ni Gog hun Magog Mandorab Tanoh na Mapansing ai; Hona Uhum ia
1Dob ai roh ma hata ni Jahowa hu bangku, mangkatahon,
2“Ale anak ni jolma, dompakkon ma bohimu hubani Gog, na i tanoh Magog, ai ma raja ni Ros, Mesek ampa Tubal, manjahai ma ho dompaksi,
3anjaha hatahon ma: Sonon do hata ni Tuhan Jahowa: Tonggor ma, roh ma Ahu mangimbang ho, ale Gog, raja ni Ros, Mesek ampa Tubal.
4Ahu do na manogu-nogu ho, bahenon-Ku do hait-hait bani osang-osangmu; pabingkaton-Ku do ho ampa haganup balamu, huda ampa siajak huda, haganup sidea marpakeian sinjata na gopas, ai ma sada hulanan banggal, haganup sidea margantar na bolag atap na etek, anjaha manintak podang;
5halak Persia, Kus ampa Put do hasomanmu, haganup do sidea margantar anjaha martangkuluk;
6sonai homa Gomer ampa haganup balani, ambahni ai ginompar ni si Togarma, na hun nagori tang parutara ampa haganup balani, buei do bangsa-bangsa mangkasomani ho.
7Marugas ma, sirsir bei ma, ho pakon haganup bala na martumpu hubam, anjaha ho ma gabe pambobai bani sidea.
8Bani dokah-dokah ni ari arahkonon ma ho; bani ujung ni jaman das ma ho bani sada nagori, na dob maluah humbani podang, bani sada bangsa na ipatumpu hun tongah-tongah ni buei bangsa-bangsa, bani dolog-dolog ni Israel, na dob dokah halong ai, tongon na pinadarat do ai hun tongah-tongah ni buei bangsa, anjaha na sonang sonari marianan sidea haganup.
9Roh do tangkog songon haba-haba, roh songon hombun manrungkub tanoh in, ho pakon haganup balamu anjaha buei bangsa-bangsa mangkasomani ho.
10Sonon do hata ni Tuhan Jahowa: Bani panorang ai, tubuh do pingkiran ibagas uhurmu, anjaha hajahaton do iranggihon ho,
11nim: Bingkat ma ahu mamorang tanoh na so marbenteng; hudorab ma halak na sonang marianan anjaha na mardamei-damei ai, ai ma haganup sidea na marhuta seng martembok, seng marpating-pating atap marhorbangan,
12laho manrampas ampa manaban, laho mardas tangan bani ianan na dob maseda ai, tapi sonari iiankon, ampa bani bangsa na dob ipatumpu ai humbani bangsa-bangsa, na dob marpinahan ampa mararta nuan, marianan i tongah-tongah ni tanoh on.
13Hatahonon ni Seba, Dedan, Tarsis ampa partiga-tigani do hubam: Ai laho martaban do ham ase roh? Ai laho manrampas do ham, ase ipatumpu ham tentaramu? Laho mambuat pirak ampa omas, laho mambuat pinahan ampa arta-arta, laho mambuat buei taban-taban?
14Halani ai, manjahai ma ho, ale anak ni jolma, hatahon ma bani Gog: Sonon do hata ni Tuhan Jahowa: Ai lang sonon do? Bani panorang ai, sanggah na marsonang-sonang bangsangku Israel marianan, marugas do ho,
15anjaha roh ho humbani iananmu, hun utara tumang, ho pakon bangsa na mangkasomani ho, haganup sidea mangajak huda, sada hulanan banggal, sada bala na gogoh;
16roh do ho mamorang bangsang-Ku Israel, songon hombun, laho manrungkub tanoh ai. Bani ujung ni jaman, arahkonon-Ku do ho mamorang tanoh-Ku, ase itanda bangsa-bangsa Ahu, anggo Hupatalar ma hapansingon-Ku i lobei ni sidea marhitei ho, ale Gog.
17Sonon do hata ni Tuhan Jahowa: Ai lang ho do ai na Husahapkon ai sapari marhitei juakjuakku, ai ma nabi-nabi ni Israel, na manjahai ijia martahun-tahun, paboa suruhon-Ku do ho mandorab sidea?
18Bani panorang ai, sanggah roh Gog manlawan tanoh Israel, nini Tuhan Naibata ma, manggila tumang do Ahu.
19Ibagas simburu ampa gajag ni ringis-Ku do Huhatahon on: Tongon, bani panorang ai masa do lalou banggal i tanoh Israel;
20jadi hitir ma i lobei-Hu dengke na i laut, manuk-manuk na i awang-awang, binatang na i talun, sagala na manggulmit, na manjulur bani tanoh ampa haganup jolma na i sisik ni tanoh on; mangkatornoh ma dolog-dolog, mangkabolah dolog batu, anjaha mangkatompas sagala tembok hu tanoh.
21Diloonku do sagala songgot-songgot dompak Gog, nini Tuhan Jahowa, marsitampulan ma samah sidea.
22Uhumon-Ku do ia marhitei sampar ampa daroh na madurus; parohon-Ku do udan doras, sira-sira, apuy ampa hirtah hu bani, hubani tentarani ampa hubani bangsa na buei ai, na mangkasomanisi.
23Sonai ma patalaron-Ku hatimbulon-Ku ampa hapansingon-Ku, anjaha Hupataridahkon diring-Ku i lobei ni buei bangsa, ase itanda sidea, Ahu do Jahowa.”