Dual PanelParbagi bani Tanoh ai
1“On ma goran ni marga ai: Mulai hun parbalogan tang parutara, hun laut manlopusi Hetlon laho hu Hamat, das hu Hazar-Enon, ai ma na bani parbalogan parutara ampa Damaskus patontang pakon Hamat, gistang hun hapoltakan hu hasundutan, ai ma parbagianan ni Dan.
2Anjaha sabalog pakon Dan, hun hapoltakan das hu hasundutan, ai ma parbagianan ni Asser.
3Anjaha sabalog pakon Asser, hun hapoltakan das hu hasundutan, ai ma parbagianan ni Naptali.
4Anjaha sabalog pakon Naptali, hun hapoltakan das hu hasundutan, ai ma parbagianan ni Manase.
5Anjaha sabalog pakon Manase, hun hapoltakan das hu hasundutan, ai ma parbagianan ni Efraim.
6Anjaha sabalog pakon Efraim, hun hapoltakan das hu hasundutan, ai ma parbagianan ni Ruben.
7Anjaha sabalog pakon Ruben, hun hapoltakan das hu hasundutan, ai ma parbagianan ni Juda.
8Anjaha sabalog pakon Juda, hun hapoltakan das hu hasundutan, ai ma tanoh na mapansing sipapuligonnima ai, bolagni dua puluh ribu asta, anjaha ganjangni dos ampa parbagianan ni sada marga, hun hapoltakan das hu hasundutan, anjaha i tongah-tongah ni ai ma ianan na mapansing ai.
9Ase tanoh na mapansing sipaleganonnima ai bani Jahowa dua puluh lima ribu asta do ganjangni, anjaha dua puluh ribu asta bolagni.
10Sonon ma parbagi bani tanoh na mapansing ai: Parbagianan bani malim, dua puluh lima ribu asta ganjangni hampit utara, sapuluh ribu asta bolagni hampit hasundutan, sapuluh ribu asta bolagni hampit hapoltakan, anjaha dua puluh lima ribu asta ganjangni hampit dangsina; i tongah-tongah ni ai ma rumah ni Jahowa.
11Ai ma rupei ni malim, na pinapansing ai, anak ni si Sadok, sidalankon horjang-Ku, ai ma na so dihut kahou rap pakon halak Israel songon halak Levi na kahou ijia.
12Ai ma parbagianan bani sidea, parbagianan na pinalegan humbani tanoh na mapansing ai, sabalog pakon halak Levi.
13Anjaha sabalog pakon parbagianan ni malim, ai ma parbagianan ni halak Levi, dua puluh lima ribu asta ganjangni anjaha sapuluh ribu asta bolagni. Haganupan ai dua puluh lima ribu asta ganjangni anjaha dua puluh ribu asta bolagni.
14Seng bulih jualon atap tukaron ni sidea ai, ase ulang madabuh ai bani tangan ni halak na legan, ai na mapansing do ai bani Jahowa.
15Ia na tading ai, lima ribu asta bolagni anjaha dua puluh lima asta ganjangni, seng pansing ai, sipakeion ma ai bani huta ai, bani rumah-rumah ampa bahen sampalan. I tongah-tongah ni ai ma huta ai.
16On do sibaranni: Hampit utara ompat ribu lima ratus asta, sonai age hampit dangsina, hampit hapoltakan ampa hampit hasundutan.
17Maningon adong do tanoh porei bani huta ai. Hampit utara dua ratus lima puluh asta, hampit dangsina dua ratus lima puluh, hampit hapoltakan dua ratus lima puluh anjaha hampit hasundutan dua ratus lima puluh asta do.
18Na tading ai, humbani ganjangni ai, na romban hubani tanoh na mapansing ai, ai ma sapuluh ribu asta hampit hapoltakan anjaha sapuluh ribu asta hampit hasundutan; ia gogohni ai bahen sipanganon ni sipangkorja i huta ai ma ai.
19Anjaha siparhorja na i huta ai, ai ma humbani ganup marga ni Israel, sidea do na mangkorjahon ai.
20Ase haganup tanoh sipapuligonnima ai, ai ma dua puluh lima ribu asta ganjangni sonai homa bolagni, ase marompat suhi do ai, ai ma tanoh na mapansing ai ampa tanoh na bani huta ai.
21Na tading ai ope, angkup lopah bani tanoh na mapansing ai ampa parbagianan na bani huta ai, raja ma simada ai, ai ma tanoh na ampar idarat ni sidua puluh lima ribu asta ai das hu parbalogan parhapoltakan, sonai homa tanoh na ampar idarat ni sidua puluh lima ribu asta ai das hu parbalogan parhasundutan, na paromban ampa parbagianan ni marga-marga ai; raja do simada ai. I tongah-tongah ni ai ma tanoh na pinalegan ai, ampa Rumah na Mapansing ai.
22Sobali ni parbagianan ni halak Levi ampa parbagianan na bani huta ai, ai ma na i tongah-tongah ni parbagianan ni raja ai; ia tanoh na i holangkolang ni parbagianan ni Juda ampa Benjamin, raja do simada ai.
23Pasal marga na legan ai: Hun hapoltakan das hu hasundutan, ai ma parbagianan ni Benjamin.
24Anjaha sabalog pakon Benjamin, hun hapoltakan das hu hasundutan, ai ma parbagianan ni Simeon.
25Anjaha sabalog pakon Simeon, hun hapoltakan das hu hasundutan, ai ma parbagianan ni Isasar.
26Anjaha sabalog pakon Isasar, hun hapoltakan das hu hasundutan, ai ma parbagianan ni Sebulon.
27Anjaha sabalog pakon Sebulon, hun hapoltakan das hu hasundutan, ai ma parbagianan ni Gad.
28Anjaha balog ni Gad hampit dangsina, gistang do ai hun Tamar das hu bah partinggilan na i Kades, hunjai manopi-nopi bah Masir hu laut bolag.
29Ai ma tanoh sibagihononnima marhitei manjomput na sinurat bahen parbagianan bani marga ni Israel, anjaha ai ma parbagianan bani sidea,” nini Tuhan Jahowa.
Pasal Horbangan ni Huta ai
30“On ma dalan kaluar humbani huta ai: Hampit lopah parutara, siompat ribu lima ratus asta ai,
31adong do tolu horbangan, ai ma horbangan Ruben, horbangan Juda ampa horbangan Levi; mangihutkon goran ni marga ni Israel do ibahen goran ni horbangan ai.
32Hampit lopah parhapoltakan, siompat ribu lima ratus asta ai, tolu horbangan homa, ai ma horbangan Josep, horbangan Benjamin, ampa horbangan Dan.
33Hampit lopah pardangsina, siompat ribu lima ratus asta ai, tolu horbangan homa, ai ma horbangan Simeon, horbangan Isasar, ampa horbangan Sebulon.
34Hampit lopah parhasundutan, siompat ribu lima ratus asta ai, tolu horbangan homa, ai ma horbangan Gad, horbangan Asser, ampa horbangan Naptali.
35Ia lilit ni huta ai inggot sapuluh ualuh ribu asta do. Anjaha goran ni huta ai hu lobeian on, ai ma: Jahowa do ijai.”