Dual PanelPanonggoran Pasal Uhum ni Naibata bani Pangisi ni Jerusalem
1Dob ai ipamaling ma sorani i lobei ni pinggolhu, “Padohor hanima ma ale sidalankon uhum bani huta on, ganup marsinjata sipangagou ibagas tanganni!
2Anjaha tonggor ma, roh ma onom halak humbani horbangan parhuluan na hampit utara, ganup marsinjata sipangagou ibagas tanganni; anjaha rap pakon sidea adong do sada dalahi na marhiou silopak, na marparugas panurat bani binongeini. Jadi roh ma sidea anjaha jongjong ma i lambung ni anjapanjap tombaga ai.
3Jadi naik ma hamuliaon ni Naibata ni Israel humbani herub ai, hasogopanni ai, hu onjolan ni labah ni rumah ai, anjaha dilo-dilo ma Ia bani dalahi na marhiou silopak ai, na marparugas sipanurat bani binongeini.”
4Nini Jahowa ma dompaksi, “Dalani ma huta Jerusalem in, anjaha bahen ma tanda bani pardompakan ni halak na morong-orong anjaha na marhoih-koih halani haganup hasamboron na idalankon i tongah-tongahni.”
5Tapi bani halak na legan ai nini do hubogei, “Siari hanima ma huta in, irik i pudini, anjaha bunuhi ma! Ulang maidop matanima, anjaha ulang adong na marholong ni atei!
6Bunuhi ma anjaha boiskon ma: na ubanon, garama, anak boru, anak-anak ronsi parinangon; tapi halak na adong tanda ai, ulang kahua! Pungkah ma humbani ianan-Ku na mapansing in!” Jadi ipungkah sidea ma humbani sintua-sintua na i lobei ni Rumah Panumbahan ai.
7Dob ai nini ma dompak sidea, “Butaki hanima ma Rumah Panumbahan in, anjaha goki ma alaman in bani halak na tarbunuh. Dob ai luar ma, anjaha ibagas huta in ma hanima mamunuhi.”
8Jadi sanggah na mamunuhi ai sidea, anjaha tading sahalak ahu, manrogop ma ahu lanjar doruh-doruh, “Ham Tuhan Jahowa, ai boiskonon-Mu do haganup teba-teba ni Israel bani na niduruskon-Mu in ringis-Mu bani Jerusalem?”
9Jadi nini ma mambalosi ahu, “Buei tumang do salah ni halak Israel ampa Juda; gok daroh na madurus do tanoh in, anjaha gok hagedukon do huta in. Nini sidea do, ʻDomma itadingkon Jahowa tanoh in, seng ikawahkon be in.ʼ
10Halani ai, Ahu pe seng maidop matang-Ku anjaha seng holong atei-Hu, tapi balaskonon-Ku do pambahenan ni sidea ai bani ulu ni sidea.”
11Anjaha tonggor ma, dalahi na marhiou silopak ai, na marparugas panurat ai bani binongeini, mulak ma patugahkon, nini, “Domma hudalankon songon na pinarentahkonmu bangku.”