Dual PanelAdu-adu ni si Jeremia Pasal Hadoharon ni Parjahat
1“Pintor do Ham, ale Jahowa porini pe dong hutuk-hutukku Bamu; age pe sonai sihol do marsahap ahu Bamu pasal sada parkara, ʻMase ma mardohar dalan ni halak parjahat? Anjaha marsonang-sonang halak sipangeluk?ʼ
2Isuan Ham do sidea, anjaha marurat do sidea; marbanggal do sidea anjaha marbuah. Dohor do Ham bani pamangan ni sidea, tapi daoh do humbagas uhurni.
3Tapi itanda Ham do ahu, ale Jahowa; ididah Ham do ahu anjaha iuji Ham do uhurhu i lobei-Mu. Tarik Ham ma sidea songon biribiri na sihol sisayaton, anjaha papulig Ham ma sidea hubani ari panayatan.
4Piga dokah nari marhoru tanoh in anjaha melus suan-suanan i talun? Halani hajahaton ni pangisi ni tanoh in do, ase masab pinahan ampa manuk-manuk, ai nini sidea, ʻSeng anjai idahonni tongon ujungta!ʼ
5Anggo loja do ho ibahen sidea maradu rap pakon na mardalan nahei, sonaha ma pambahenmu maradu pakon huda? Anjaha anggo seng sonang iahap ho bani tanoh na mardamei-damei, sonaha ma pasal ho i harangan ni Jordan?
6Ai gari saninamu pakon parrumah ni bapamu, sidea pe seng bujur dompak ho; martahi-tahi do sidea i pudimu. Ulang porsaya ho bani sidea, age pe basar parsahap ni sidea bam.”
Pusok ni Uhur ni Jahowa Mangidah Tanoh Parbagianan-Ni
7“Domma Hutadingkon rumah-Ku, domma Huambukkon parbagianan-Ku; domma Huondoskon haudungan ni uhur-Hu hubagas tangan ni munsuhni.
8Gabe songon singa na i harangan do parbagianan-Ku dompak Ahu; ipamaling do sorani dompak Ahu, halani ai do ase magigi Ahu hu bani.
9Gabe manuk-manuk panoroh sirintik do parbagianan-Ku Bangku. Manuk-manuk panoroh do roh inggot mandorabsi. Laho ma hanima, patumpu ma sagala binatang na i talun, ase roh mangankon.
10Buei do parmahan na parseda pohon anggur-Hu, ilot-loti sidea do jumang-Ku, gabe halimisan do juma harosuh-Ku ibahen sidea.
11Gabe halimisan do ai ibahen sidea, marhoru i lobei-Hu halani maseda, tarulang do tanoh in ganup, seng dong na mampardulihon.
12Bani haganup buntu-buntu na leseng, i halimisan domma roh na parsedahon. Ai podang ni Jahowa do na mangankon hun ujung ni tanoh na sada das hu ujung ni tanoh na sada nari; seng dong damei bani sagala na tinompa.
13Omei do isabur sidea, hape duri do isabi; ilojai sidea do dirini hape seng marlaba. Seng tarhamegahkon sidea pariama ni sidea, halani gajag ni ringis ni Jahowa.”
Sura-sura ni Naibata Pasal Bangsa-bangsa Simbalog ni Israel
14Sonon do hata ni Jahowa, “Pasal haganup simbalog-Ku na jahat in, na mangonai tangan bani parbagianan-Ku, na Hubere gabe siteanon ni bangsang-Ku Israel, ʻTonggor ma, orbaton-Ku do sidea hun tanoh ni sidea, anjaha ginompar ni Juda orbaton-Ku do hun tongah-tongah ni sidea.ʼ
15Tapi anggo domma Huorbat sidea, marpangulaki do uhur-Hu mangidah sidea, anjaha boanon-Ku do sidea use mulak ganup hu bani parbagiananni ampa hu tanohni bei.
16Dob torang iguruhon sidea dalan ni bangsang-Ku, ai ma marbija marhitei goran-Ku, ʻSongon sintongni manggoluh Jahowa!ʼ Songon sidea na mangajari bangsang-Ku marbija marhitei Baal, jadi pajonamon do sidea i tongah-tongah ni bangsang-Ku.
17Tapi anggo seng itangihon sidea, orbaton-Ku do bangsa na sonai ai, anjaha boiskonon-Ku, nini Jahowa.”