Dual PanelUhum na Mangonai bani Samaria, Huta Pamatang ni Harajaon Parutara ai
1Bursik ma sortali hajengeson ni halak na mabuk i Efraim, ampa hameluson ni bunga ni hasangaponni na jagar ai, ai ma na bani ulu ni pamah na lambutan, ianan ni halak na mabuk binahen ni anggur.
2Tonggor ma, dong do sada na margogoh ampa na markuasa bani Tuhan; songon udan na marambolas do ai, songon halisungsung na mansedahon, songon udan na manalosou, bah na marbanggal, na manimpalhon hu tanoh gogoh-gogoh.
3Marhitei nahei do lotlotanni sortali hagijangon ni halak na mabuk i Efraim,
4ampa hameluson ni bunga ni hasangaponni na jagar ai, ai ma na bani ulu ni pamah na lambutan, songon buah ni hayu ara na parlobei mabei paima musim milas; anggo adong na mangidah ai, mintor ibondut do daskonsi i tanganni.
5Bani ari ai Jahowa Zebaot ma gabe sortali hamuliaon ampa rudang hajengeson bani na tading humbani bangsa-Ni,
6ampa tonduy habonaron bani halak sidabuh uhum, ampa gogoh bani halak na mangusir munsuh hun horbangan.
Uhum na Mangonai bani Malim-malim ampa Nabi na i Jerusalem
7Age halak on, rebad-rebad do ibahen anggur, anjaha mirdong ibahen siinumon na koras; malim ampa nabi rebad-rebad do ibahen siinumon na koras, mabuk ibahen anggur; minggot do sidea halani siinumon na koras, kahou sidea ibagas na manjahai, anjaha mugar-ugar uhurni mandabuh uhum.
8Tongon, ganup do meja gok ibahen utah-utah ni sidea, seng dong ianan na so butak.
9Nini sidea, “Bani ise do sihol ajarhononni habotohon, anjaha bani ise do sihol patorangonni pangungkabon? Bani na baru sirang minum nani, bani na baru ganggang humbani tadahni?
10Lalab titah, lalab aturan, lalab titah, lalab aturan, ijon otik, ijai otik.”
11Tongon, marhitei halak parsahap na so niarusan ampa parhata na legan do Naibata sihol marsahap bani bangsa on:
12Ia na dob mangkatahon bani sidea, “On do parsaranan, palopas marsaran na loja in, anjaha on do ianan hasonangan.” Tapi seng itangihon sidea.
13Jadi mangonai ma bani sidea hata ni Jahowa -- lalab titah, lalab aturan, lalab titah, lalab aturan, ijon otik, ijai otik -- gabe tinggalak ma sidea sanggah mardalan, maripuk hona jarot anjaha tartangkap.
14Halani ai tangar hanima ma hata ni Jahowa, ale halak sipanrehei, na marrajai bangsa on, na marianan i Jerusalem.
15Ai ihatahon hanima do, “Domma marpadan hanami pakon hamatean, anjaha domma manriah hanami pakon nagori toruh, paboa anggo roh bah marbanggal, seng anjai das ai bennami; ai domma ibahen hanami haporusannami ladung, anjaha pangoto-otoion ibahen hanami parlingodannami.
16Halani ai sonon do hata ni Tuhan Jahowa, ʻTonggor ma, Hupatibal do i Sion sada batu onjolan, sada batu na dob niuji, sada batu parsuhi na maharga, bahen onjolan na totap. Barang ise na porsaya Bani, seng anjai tarbador.ʼ
17Anjaha bahenon-Ku do habonaron gabe bonang arang, anjaha hapintoron gabe tali dondon; anjaha ayubkonon ni udan ambolas do haporusan ladung anjaha bah marbanggal do mambaorhon parlingodan,
18anjaha masabkononkon do padannima pakon hamatean anjaha seng asi be panriahannima pakon nagori toruh; anggo roh bah marbanggal ai, ropukonni do hanima.
19Barang piga hali pe ia roh, luahononni do hanima; tongon, siap sogod do ai roh, arian pakon borngin. Anjaha pitah songgot-songgot do mambahen naarusi pangungkabon.
20Ai mapondoktu do podoman sihol tibal mangintordang ijai, anjaha sabing hurang bolag parsabingon.
21Ai jongjongkonon ni Jahowa ma songon na bani Dolog Perasim, anjaha gajag ma ringis-Ni songon na i pamah Gibeon, laho pasaudkon horja-Ni, tapi ganjil do horja-Ni -- laho mandobkon lahoan-Ni -- legan humbani na somal do lahoan-Ni!
22Ai pe, ulang nunut pahiri-hirihon, ase ulang roh poltikni panangkutnima, ai domma hubogei hasedaon humbani Jahowa Zebaot, na dob pinutuskon-Ni bani sab tanoh on.”
Limbaga na Patorangkon Pingkiran ni Naibata na gok Halongangan ai
23Paeleng pinggolmu, tangar sorangku, bogei anjaha tangar ma hatangku!
24Ai ganup ari do paninggala maninggala laho martidah? Ai torus do inunut manangkul pakon manisir tanohni?
25Ai lang sonon do? Dob ipados tanoh ai, ai lang isaburhon ma longa, itidahkon juragi, marbaris isuan gandum, anjaha inahkon jagul bani iananni, anjaha andolei songon balogni ibahen?
26Sonai do ia ipodahi sintong-sintong, Naibatani do mangajarisi.
27Tongon, seng marhitei gareta pardogei idogei halak longa, seng galapang ni gareta ibahen halak mardogei juragi, tapi marhitei tungkot do idogei longa, anjaha juragi marhitei bogbog-bogbog.
28Ai iropuki halak do gandum? Lang, seng paturutonni lotlotan ai lalab. Anggo ipadalan galapang ni garetani ampa hudani hunjai, seng iropuk ai.
29Age ai marharorohan humbani Jahowa Zebaot do, halongangan do sura-sura-Ni, anjaha timbul do hapentaran-Ni.