Dual PanelSitaronon Halani Balang Martuduh-tuduh bani Ari ni Tuhan
1Hata ni Jahowa na roh hubani si Joel, anak ni si Petuel.
2Tangihon ma on, nasiam na matua, anjaha pardiateihon ma, nasiam ganup pangisi ni tanoh on! Ongga ma sonon masa bani ari nasiam, atap bani ari ni ompung nasiam?
3Baritahon nasiam ma pasal in hubani anak nasiam, anak nasiam hubani anak ni sidea, anjaha anak ni sidea use hubani sundut na i pudini.
4Aha na tinebahon ni tatadu igagat balang, aha na tinebahon ni balang igagat tamponok, anjaha aha na tinebahon ni tamponok igagat hirik.
5Puho ma nasiam parmabuk, anjaha tangis ma; mandoraki ma nasiam ganup sisobur anggur, marhalanihon anggur na mantin, ai domma irotap in humbani pamangan nasiam.
6Ai domma tangkog dompak tanoh-Ku sada bangsa na gogoh anjaha na so tarhira bueini; iponni songon ipon ni singa, anjaha saitni songon sait ni singa boru-boru.
7Domma iparseda hayu anggur-Hu, anjaha ituhtuhi hayu arang-Ku; domma iorlak anjaha ipanrumbakkon, domma lopak sagala rantingni.
8Tangis ma songon boru laho, na marhiou guni halani tunangan bani haposoonni.
9Domma irotap galangan sipanganon pakon galangan siinumon humbani rumah ni Jahowa; marhoru do sagala malim, juakjuak ni Jahowa.
10Domma seda juma, marhoru tanoh, halani seda omei, horah bah ni anggur anjaha melus hayu Jetun.
11Rusak parjuma-juma, mandoraki parpohon anggur halani gandum pakon bajaurei; ai magou do partahunan.
12Domma melus hayu anggur, anjaha ranggasan hayu ara; age dalima, kurma, untei ampa ganup hayu na i talun domma melus; domma mandaoh homa malas ni uhur humbani anak ni jolma.
Ojur-ojur Paundukkon Uhur bani Naibata
13Margondit anjaha tangis ma nasiam alo sagala malim; mandoraki ma nasiam, nasiam siparugas bani anjapanjap! Roh ma marborngin, marsabing hiou guni ma nasiam alo juakjuak ni Naibatangku! Ai domma irotap galangan sipanganon pakon galangan siinumon hun rumah ni Naibata nasiam.
14Papansing ma sada ari parpuasaon, tingtingkon ma sada ari partumpuan na majombut! Patumpu ma na matua-matua pakon haganup pangisi ni nagori on hu rumah ni Jahowa, Naibata nasiam; anjaha mandoruh ma nasiam bani Jahowa.
15Aih, sonaha ma bani ari ai! Ai domma dohor ari ni Jahowa, anjaha songon hasedaon humbani Pargogoh Na So Tarimbang parrohni ai.
16Ai lang domma irotap sipanganon hun lobei ni matanta, malas ni uhur ampa olob-olob hun rumah ni Naibatanta?
17Domma masik bonih i toruh ni olbakni, domma halong rumah parugasan, mareong tuangan, halani masak omei.
18Aih, pangarou ni pinahan in! Humationg do hulanan ni lombu, halani seng dong panggagatan bani sidea; sonai homa hulanan ni biribiri holte-holtean do.
19Hu Bamu do ahu, ale Jahowa dilo-dilo. Ai domma bois ipangan apuy sampalan na i halimisan, anjaha mosog sagala hayu na i talun ibahen gajag ni apuy.
20Sonai homa binatang harangan dilo-dilo do hu Bamu, ai domma horah sagala bah, anjaha domma bois ipangan apuy sampalan na i halimisan.