Alkitab Mobile SABDA
[VER] : [SIMALUNGUN]     [PL]  [PB] 
 <<  Yohanes 16 >> 

1“Haganupan in Huhatahon bennima ase ulang sangsi hanima holi.

2Pabalion ni sidea do hanima hun rumah parguruan \it (sinagoge)\it*, anjaha na roh ma panorangni gabe songon na manggalang bani Naibata do na mamunuh hanima, ninuhur ni sidea.

3Sonai do bahenon ni sidea halani lang itandai sidea Bapa in, age Ahu.

4Tapi Hupatugah hinan in bannima, ase idingat hanima bani panorangni masa in, paboa na dob Huhatahon do in bannima. Seng humbani mungkahni Hupatugah in bannima, halani rap ope Ahu pakon hanima.

Ulih Halani Parmisir ni Jesus; Horja ni Tonduy Na Pansing

5“Tapi na laho ma Ahu nuan marayak na marsuruh Ahu, anjaha seng dong age ise hun bennima na manungkun Ahu, ?Na laho huja do Ham??

6Lambin pusok tene uhurnima, halani Huhatahon in bannima.

7Tapi na sintong do na Huhatahon on bannima, ulihnima do in anggo laho Ahu. Ai ambit seng laho Ahu, seng anjai roh Sipangapiti in bannima, tapi anggo laho Ahu, suruhon-Ku do Ia bannima.

8Anggo roh Ia, ajaran-Ni do dunia on pasal dousa, pasal hapintoron ampa pasal uhum.

9Anggo pasal dousa, ai ma na so porsaya sidea Bangku.

10Anggo pasal hapintoron, ai ma na laho Ahu marayak Bapa, gabe seng idahonnima be Ahu.

11Anggo pasal uhum, ai ma na dob hona uhum raja ni dunia on.

12Buei ope namin sihatahonon-Ku bannima, tapi seng tarboan hanima ope ai sonari.

13Tapi rohkonsi Tonduy Hasintongan in, arahkonon-Ni do hanima hubagas sagala hasintongan; ai seng adong humbani Dirini sihatahonon-Ni, tapi na binogei-Ni, ai do hatahonon-Ni, anjaha patugahon-Ni do bannima na sihol masa ope.

14Pasangapon-Ni do Ahu, ai buaton-Ni do na dong Bangku, laho mangambilankonsi bannima.

15Haganup na bani Bapa in, na dong Bangku do in; halani ai do ase Huhatahon, buaton-Ni do na dong Bangku, laho mangambilankon-Si bannima.”

Isahapkon Jesus Pasal Parmisir-Ni ampa Parroh-Ni use

16“Tongkin nari mando, gabe seng idahonnima be Ahu, dob ai tongkin nari use, idahonnima ma Ahu.”

17Gabe nini susian ai ma samah sidea, “Aha do arti ni na hinatahon-Ni in banta, ?Tongkin nari mando seng idahonnima be Ahu, dob ai tongkin nari use, idahonnima ma Ahu,? ambah ni ai, ?na laho ma Ahu bani Bapa in??”

18Jadi nini sidea ma, “Aha do artini hata, ?Tongkin nari mando?? Seng ibotoh hita artini ai.”

19Ibotoh Jesus ma, sihol roh sidea manungkun-Si, gabe nini ma dompak sidea, “Na marsisungkunan do hanima pasal na Huhatahon in, ?Tongkin nari mando seng idahonnima be Ahu,? dob ai, ?Tongkin nari use idahonnima ma Ahu??

20Na sintong tumang do na Huhatahon on bannima, na laho tangis ma hanima anjaha mandoruhi, tapi malas ma uhur ni dunia on. Pusok do anggo uhurnima, tapi marubah ma pusok ni uhurnima gabe malas ni uhur.

21Pusok do uhur ni parinangon manubuhkon dakdanakni anggo jumpah ma panorangni. Tapi dob tubuh dakdanak ai, seng be idingat na maborit ai, ibahen malas ni uhurni, halani na dob tubuh sada jolma hu dunia on.

22Bannima pe nuan pusok ni uhur do, tapi idahon-Ku do hanima use, gabe marmalas ni uhur ma hanima, anjaha ise pe lang boi mambuat malas ni uhur ai hun bennima.”

Pasal Tonggo Ibagas Goran ni Jesus

23Seng sungkunonnima be Ahu bani na sadari ai. Na tongon tumang do na Huhatahon on bannima, atap aha pe sipindoonnima humbani Bapa in, sai na bereon-Ni do marhitei goran-Ku.

24Ronsi sonari seng ope mangindo hanima marhitei goran-Ku. Pindo hanima ma, ase manjalo hanima, ase gok malas ni uhurnima!

25Marhitei limbaga do Husahapkon in bannima. Na roh ma panorangni, seng marlimbaga be Ahu marsahap pakon hanima, tapi torang-torang ma baritahonon-Ku bannima pasal Bapa in.

26Bani ari ai ma hanima mangindo marhitei goran-Ku, anjaha seng Huhatahon bannima, Ahu manonggohon hanima bani Bapa in,

27ai Bapa in sandiri mangkaholongi hanima, halani na dob holong uhurnima Bangku, anjaha na dob porsaya hanima, Ahu roh humbani Naibata.

28Na bingkat humbani Bapa in do Ahu roh hu dunia on; tadingkonon-Ku ma use dunia on, laho marayak Bapa in.”

29Nini susian-Ni ai ma, “Sonari pe, ase torang hata-Mu, seng songon limbaga be.

30Sonari ma ibotoh hanami, paboa ibotoh Ham do haganup, anjaha seng pala porlu Bamu, sungkunon ni atap ise Ham. Halani ai ma, ase porsaya hanami, na bingkat humbani Naibata do Ham.”

31Ibalosi Jesus ma sidea, “Porsaya ma hanima sonari?

32Na roh ma panorangni anjaha domma roh in nuan, mambur merap ma hanima, ganup marsitohu dalanni, anjaha tadingkononnima ma Ahu punjung; tapi seng punjung Ahu tene, ai Bapa in do hasoman-Ku.

33Huhatahon hinan in bannima, ase mardamei hanima ibagas Ahu. Hamarsikon do rupeinima i dunia on, tapi tenger ma uhurnima, domma Hutaluhon dunia on.”


  Share Facebook  |  Share Twitter

 <<  Yohanes 16 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran