Dual PanelParkahap hu Huta Jeriko
1Dob ai isuruh si Josua, anak ni si Nun ma dua halak parkahap hun Sittim, nini ma, “Laho ma nasiam, kahapi nasiam ma tanoh ai pakon Jeriko.” Jadi laho ma sidea, imasuki sidea ma rumah ni sada boru jalang, na margoran si Rahap, lanjar modom ma sidea ijai.
2Anjaha dong ma halak na mangkatahon hubani raja ni Jeriko, “Tonggor ma, adong do roh borngin on hujon dalahi humbani halak Israel mangkahapi tanoh on.”
3Jadi isuruh raja ni Jeriko ai ma halak hubani si Rahap, nini ma, “Boan ma hu darat dalahi na roh hubam, na masuk hu rumahmu; ai na mangkahapi ganup tanoh on do ase roh sidea.”
4Tapi domma iboan naboru ai hinan dalahi sidua halak ai anjaha iponopkon sidea; jadi nini ma, “Tongon, dong do dalahi roh hu bangku, tapi lang hubotoh barang hunja sidea roh;
5tapi marayak laho mangoruk horbangan, dob golap ari, luar ma dalahi ai; seng hubotoh barang huja laho dalahi ai; podas ma ayaki nasiam sidea, sai jumpah nasiam do sidea.”
6Tapi domma ihatahon naboru ai hinan sidea naik hu tayub, anjaha iponopkon sidea hu toruh ni hori, na jinomurni i atas tayub ai.
7Jadi iayak dalahi ai ma sidea bani dalan na laho hu Jordan, das hu pandiparan ai; anjaha ioruk ma horbangan ai dob luar na mangayaki ai.
8Anjaha paima modom sidea, naik ma naboru ai hu tayub marayak sidea.
9Jadi nini ma dompak dalahi ai, “Domma hubotoh, na dob ibere Jahowa do tanoh on bani nasiam, anjaha domma sogop bennami biar mangidah nasiam, anjaha gobir pangisi ni tanoh on i lobei nasiam.
10Anjaha domma ibogei hanami naha pangkorahkon ni Jahowa bani bah ni Laut Sigerger i lobei nasiam, sanggah na luar ai nasiam hun tanoh Masir, pakon na binahen nasiam bani raja ni halak Amori na i dipar ni Jordan, bani raja Sihon pakon bani raja Og, ai ma na binoiskon nasiam ai.
11Jadi dob ibogei hanami ai, madotei ma atei-ateinami, anjaha seng pag be uhur ni barang ise, halani biarni mangidah nasiam, ai Jahowa Naibata nasiam, Ia do Naibata i nagori atas pakon i nagori tongah on.
12On pe, bijahon nasiam ma bangku marhitei Jahowa, paboa songon pangidopingku bani nasiam, sonai ma pangidopi nasiam bani pangisi ni rumah ni bapa, anjaha bere nasiam ma bangku sada tanda ni habujuron,
13paboa pagoluhon nasiam do bapa, inang, botouhu pakon saninangku ronsi ganup na bani sidea, anjaha paluahon nasiam do hosahnami humbani hamatean.
14Jadi nini dalahi ai ma bani, “Hosahnami gantih nasiam hu hamatean! Anggo seng ipatugah-tugah nasiam hatanta on, anjaha anggo ibere Jahowa ma tanoh on bennami, sai bahenonnami do bamu idop ni uhur pakon habujuron.”
15Jadi itantan ma sidea marhitei tali humbani jandela, ai bani tembok ni huta ai do ipajongjong rumahni ai, ai marianan i atas ni tembok ai do ia.
16Dob ai nini ma dompak sidea, “Dompak dolog ma nasiam laho, ase ulang pajumpah nasiam pakon na mangayak-ayak ai, marponop ma nasiam ijai tolu ari dokahni, paima mulak na mangayak-ayak ai, dob ai nunuti nasiam ma dalan nasiam.”
17Dob ai nini dalahi ai ma hu bani, “Maluah ma hanami humbani bulawanmu on, na sinuruhmu bulawankononnami.
18Tonggor ma, anggo masuk ma hanami hu tanoh on, maningon sangkutkononmu ma tali na gerger on bani jandela panantananmu bennami; anjaha patumpu ma hu rumahmu bapamu, inangmu, saninamu pakon sagala pangisi ni rumahmu.
19Anjaha barang ise na luar hun labah ni rumahmu hu darat, marsapata hu bani ma darohni, maluah do anggo hanami; tapi barang ise na rap pakon ham i rumah on, marsapata hu bennami ma darohni, anggo ikahua tangan ni barang ise ia.
20Tapi anggo ipatugah-tugah ham hatanta on, maluah ma hanami humbani bulawanmu on, na sinuruhmu bulawankononnami.”
21Jadi nini ma, “Songon na hinatahon nasiam ai ma tongon.” Dob ai ipalaho ma sidea, gabe bingkat ma sidea. Jadi isangkutkon ma tali na gerger ai hubani jandela ai.
22Jadi laho ma sidea, gabe das ma sidea hu dolog ai, lanjar ijai ma sidea tolu ari dokahni, paima mulak na mangayak-ayak ai; sai iburu pangayak-ayak ai do namin sidea bani jojor dalan ai, tapi seng jumpah sidea.
23Dob ai mulak ma dalahi na dua halak ai, tuad hun dolog ai, mandipar ma sidea, gabe das ma sidea hubani si Josua, anak ni si Nun, anjaha ipajojor sidea ma hubani haganup na masa bani sidea.
24Nini sidea ma dompak si Josua, “Domma ondos hu tanganta ibere Jahowa ganup tanoh ai, anjaha domma mangunduk ganup pangisi ni tanoh ai ibahen biarni mangidah hita.”