Dual PanelParsunaton pakon Paskah i Gilgal
1Jadi dob ibogei haganup raja ni halak Amori, sagala na i dipar ni Jordan, hampit hasundutan, pakon haganup raja ni halak Kanaan, sagala na i topi ni laut, na dob pinahorah ni Jahowa bah ni Jordan i lobei ni halak Israel, paima mandipar sidea, gabe madotei ma atei-atei ni sidea, anjaha malitonduy ma sidea, i lobei ni halak Israel.
2Ijia ma ihatahon Jahowa hubani si Josua, “Bahen ma bam raot humbani batu, anjaha ulaki ma manunat halak Israel paduhalihon.”
3Jadi ibahen si Josua ma bani raot humbani batu, anjaha isunat ma halak Israel i atas ni buntu-buntu sibur-sibur.
4Anjaha on do halani ase isunat si Josua sidea: Ganup bangsa ai, na luar hun Masir, ai ma dalahi sagala siimbang munsuh, domma marmateian i halimisan, i tongah dalan, dob luar sidea hun Masir.
5Ai tarsunat do ganup halak na luar ai, tapi sagala halak na itubuhkon i halimisan, i tongah dalan, dob luar sidea hun Masir, seng marsunat.
6Ai ompat puluh tahun dokahni mawat-awat halak Israel i halimisan, paima siap sagala bangsa, dalahi siimbang munsuh, na luar hun Masir, halani na so tinangihon ni sidea sora ni Jahowa; mambahen marbulawan Jahowa hubani sidea, paboa na so bulih idahon ni sidea tanoh, na dob nibulawankon ni Jahowa hubani ompung ni sidea siberehonon-Ni hu banta, tanoh habaoran ni dadih pakon manisan ni huramah.
7Jadi anak ni sidea ma ipajongjong gantih ni sidea, na sinunat ni si Josua, ai marsibur-sibur do sidea, halani na so isunat sidea i tongah dalan.
8Jadi dob salpu ganup bangsa ai marsunat, tading ma sidea bani ianan ni sidea i parsaranan ai, paima malum iahap sidea.
9Dob ai nini Jahowa ma dompak si Josua, “Sadari on gulangkonon-Ku ma habadoron ni Masir humbani nasiam.” Anjaha sonai ma targoran ianan ai, Gilgal ronsi sadari on.
10Jadi sanggah na marsaran ai halak Israel i Gilgal, marhorja Paskah ma sidea bani ari sapuluh ompat bulan ai, bodari-bodari, i pamah Jeriko.
11Jadi patarni, dob marhorja Paskah ai, bani ari na sasada ai ipangan sidea ma gogoh ni tanoh ai, ai ma ruti na so niigaran pakon gandum na pinahpah.
12Jadi marsaran ma roh manna patarni ai, dob ipangan sidea gogoh ni tanoh ai; seng dong be manna bani halak Israel, gabe ipangan sidea ma gogoh ni tanoh bani na satahun ai.
13Sanggah partalar ni Naibata bani si Josua, dohor do si Josua hu huta Jeriko; mangkawah ma ia manatap inggot, gabe iidah ma sada halak jongjong i lobeini, pajolom-jolom podang na sinintak ibagas tanganni. Jadi iparayak si Josua ma ia, nini ma dompaksi, “Hasoman do Ham barang imbang?”
14Nini ma dompaksi, “Lang, pambobai ni bala ni Jahowa do Ahu, ai pe ahu roh.” Jadi manrogop ma si Josua hu tanoh anjaha marsombah, anjaha nini ma dompaksi, “Aha do na sihol hatahonon ni Tuhanku bani juakjuak-Ni?
15Jadi nini pambobai ni bala ni Jahowa ai ma dompak si Josua, “Tanggali ma sipatumu humbani naheimu, ai na pansing do ianan hajongjonganmon.” Jadi ibahen si Josua ma sonai.