Dual PanelTonggo ni si Jona ampa Parluahni
1(2-2) Dob ai martonggo ma si Jona hubani Jahowa Naibata, humbani bituha ni dengke ai,
2(2-3) nini ma, “Dilo-dilo do ahu ibagas hasosakanku hubani Jahowa, jadi ibalosi do ahu; humbani bituha ni nagori toruh do dilo-dilo ahu, itangihon Ham do sorangku.
3(2-4) Igijigkon Ham do ahu hu na bagas, hu tongah-tongah ni laut, gabe iinggoti bah do ahu; ganup umbakmu ampa gilumbangmu mardalan i babouhu.
4(2-5) Anggo ahu, domma huhatahon, domma pinabali ahu hun lobei ni panonggor-Mu. Sonaha ma boi ahu use mangkawah dompak rumah hapansingon-Mu?
5(2-6) Bah do rungkub i babouhu, iinggoti bah na bagas do ahu, anjaha limut maralit-alit bani ulungku.
6(2-7) Tuad do ahu ronsi bona ni dolog, anjaha pating-pating ni tanoh pe domma tutup i pudingku lalab. Ijia ma ipatangkog Ham goluhku humbagas godung, ale Jahowa Naibatangku.
7(2-8) Sanggah mandatei hosahku ibagas, hudingat ma Jahowa; jadi das ma tonggongku Bamu, hu rumah hapansingon-Mu.
8(2-9) Tapi halak na mambalosi sisombahon sisoya-soya, na manadingkon haporusanni do sidea ai.
9(2-10) Tapi anggo ahu marhasoman sora puji-pujian do ahu manggalang Bamu, galaronku do na dob hubagahkon. Bani Jahowa do haluahon.”
10(2-11) Dob ai marsahap ma Jahowa hubani sengke ai; jadi iutahkon ma si Jona bani na horah.