Dual PanelHasosakan ni Jerusalem ampa Haluahonni
1Pangungkabon humbani Naibata. Hata ni Jahowa pasal Israel. Sonon do hata ni Jahowa, sipaherbang langit, sipajonam tanoh on anjaha na manjadihon tonduy ibagas jolma in,
2“Tonggor ma, Ahu mambahen Jerusalem gabe panginuman hamabukon bani haganup bangsa inggot; das do ai homa hu Juda sanggah pangkubuon ni Jerusalem.
3Bani ari ai bahenon-Ku ma Jerusalem gabe batu pangujian gogoh bani haganup bangsa; anjaha sagala na sihol mangangkat ai luha ma ia bahenonni; anjaha sagala bangsa na i tanoh on martumpu-tumpu sihol mangimbang huta ai.”
4Bani ari ai nini Jahowa, “Hirjat ma bahenon-Ku sagala huda, anjaha ratou na mangkundulisi. Tapi anggo mangidah ginompar ni Juda kawah do matang-Ku; huda ni sagala bangsa ai, pitung do ganupan bahenon-Ku.
5Dob ai hatahonon ni kopala-kopala ni Juda ma ibagas uhur ni sidea, ʻMarhagogohon do Jerusalem marhitei Jahowa Zebaot, Naibata ni sidea ai.ʼ
6Bani ari ai Ahu mambahen kopala-kopala ni Juda songon hudon parapuyan i tongah-tongah ni soban, songon rigapan i tongah-tongah ni radean; jadi boiskononni ma sagala bangsa inggot hampit siamun ampa hampit sambilou, tapi anggo Jerusalem totap do jongjong bani iananni hinan.
7Jadi parlobei ma bereon ni Jahowa hamonangan bani lampolampo ni Juda ase ulang mangenjeng habanggalon ni rumah ni si Daud ampa habanggalon ni pangisi ni Jerusalem dompak Juda.
8Bani ari ai ondingan ni Jahowa do pangisi ni Jerusalem, gabe doskon si Daud ma sigalekan humbani sidea bani ari ai, anjaha ginompar ni si Daud, songon Naibata, songon malekat ni Naibata i lobei ni sidea.
9Bani ari ai siapkonon-Ku ma sagala bangsa-bangsa na roh mamorang Jerusalem.”
Tangis Panolsolion Mardingat na Tarpantom ai
10“Anjaha useihonon-Ku ma bani ginompar ni si Daud ampa bani pangisi ni Jerusalem tonduy paridop ni uhuran ampa partonggoon, gabe patonggor-tonggoron ni sidea ma ia, na dob pinantom ni sidea ai; anjaha tangisan ni sidea ma ia songon panangisi bani anak sasada, anjaha pusok tumang uhur ni sidea manangisi songon panangisi bani anak bunga tubuh.
11Bani ari ai masa ma partangison bolon i Jerusalem songon partangison pasal Hadad Rimon i habungan Megiddo.
12Tangis ma pangisi ni tanoh on, pulig mar sasaompung; ginompar ni si Daud, na saompung pulig, parinangon ni sidea homa pulig; ginompar ni si Natan, na saompung pulig, parinangonni pe pulig;
13ginompar ni si Levi, na saompung pulig, parinangon ni sidea pe pulig; ginompar ni si Simei, na saompung pulig, parinangon ni sidea pe pulig,
14sonai homa ginompar ni marga na legan ai ganup pangku pulig bei, anjaha parinangon ni sidea pe pulig bei.