Alkitab Mobile SABDA
[VER] : [SIMALUNGUN]     [PL]  [PB] 
 <<  Zefanya 2 >> 

Golpa-golpa Patoruh Uhur Paima Roh Ari Uhum

1Roh ma nasiam martumpu anjaha bahen nasiam ma partumpuan, ham bangsa na so mambotoh na maila,

2paima hona usir nasiam songon dogdog na hinabangkon, paima sogop bani nasiam ari panringison ni Jahowa.

3Pindahi nasiam ma Jahowa, nasiam ganup na toruh maruhur i tanoh on, nasiam na mangkorjahon parentah-Ni; pindahi nasiam ma hapintoron, pindahi ma toruh ni uhur, andohar iondingi nasiam bani ari panringison ni Jahowa.

Uhum Dompak Halak Palistim

4“Ai maningon tarulang do Gasa, anjaha Askalon gabe halimisan. Maningon usiron ni halak do par Asdod sanggah tongah ari, anjaha iurati ia Ekron.

5Magou ma hanima na marianan i tanoh na martopihon laut, hanima bangsa Kereta. Mangonai ma hata ni Jahowa bam, ale Kanaan, tanoh ni halak Palistim; agouhonon-Ku ma ho, ase ulang be dong na mangindahi ho.

6Gabe sampalan ma tanoh na martopihon laut, parmahanan bani parmahan ampa harang bani hulanan ni biribiri.

7Jadi simasima ni bangsa Juda ma simada tanoh ai, sidea ma marmahan ijai, anjaha i rumah na i Askalon sidea marsaran bodari. Ai anjaha pasuangonni do haadongon ni sidea.”

Uhum Dompak Halak Moab ampa Amon

8“Domma Hubogei pangapasion ni Moab ampa panrisaon ni halak Amon, sonaha pangapasi ni sidea bani bangsang-Ku, anjaha mangenjeng sidea pasal tanoh ni sidea.

9Halani ai, songon sintongni manggoluh Ahu,” nini Jahowa Zebaot. “Naibata ni Israel, maningon songon Sodom do Moab anjaha halak Amon songon Gomora, hatubuhan ni latong ampa pambuatan ni garam ampa halimisan lalab, anjaha tabanon ni simasima ni bangsang-Ku do sidea, anjaha na tading humbani bangsang-Ku do manean sidea.

10Ai maningon bani sidea do on halani gijang ni uhur ni sidea, halani mangapasi sidea anjaha mangenjeng sidea dompak bangsa ni Jahowa Zebaot.

11Jombut ma Jahowa bani sidea; ai siapkonon-Ni do sagala naibata na legan i atas tanoh on, gabe marsombah ma hubani ganup halak humbani iananni, ganup tanoh ni bangsa sipajuh begu-begu.”

Uhum bani Etiopia pakon Assur

12“Hanima pe halak Etiopia, maningon bunuhon ni podang-Ku do hanima.

13Dob ai pagostongon-Ni ma tangan-Ni dompak utara, anjaha agouon-Ni ma Assur, anjaha tarulang bahenon-Ni Ninive, horah songon halimisan.

14Marsaran ma i tongah-tongahni hulanan ni pinahan, bagei-bagei ni binatang na i talun; gabe parbornginan ni sipauk ampa tanggiling ma galapang ni rumah ni sidea; mandoding ma kiung bani jendela anjaha kawak bani molmolan, ai domma iparseda halak parhayu ares ai.

15Sonai ma kota na ramei ai, na marsonang-sonang marianan, na mangkatahon ibagas uhurni, ʻAhu ma da in, sobali ahu seng dong!ʼ Sonaha do parjadini ai gabe halimisan, ianan ni binatang panoroh! Sagala halak na mamontas hunjai mapas ma anjaha iangkat tanganni manrehei.”


  Share Facebook  |  Share Twitter

 <<  Zefanya 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel