Dual Panel1PANGERAN ngandika ka Musa,
2"Urang Israil pentaan iteuk dua welas siki, hiji iteuk ti unggal pamingpin kaom masing-masing. Ngaran anu bogana tuliskeun dina iteukna.
3Ngaran Harun tulis dina iteuk wakil urang Lewi. Jadi hiji iteuk ti saban pamingpin kaom.
4Bawa ka Kemah Kami, teundeun hareupeun Peti Perjangjian paranti Kami mayunan maneh.
5Jelema anu ku Kami kapilih, iteukna bakal sirungan. Hal ieu ku Kami rek dipake jalan ngeureunkeun gegelendengna urang Israil, ulah sina ngaralawan bae ka maneh."
6Musa mundutan ka urang Israil hiji iteuk ti unggal pamingpin kaom, jumlah dua welas iteuk. Iteuk Harun dicampurkeun ka dinya.
7Ku Musa tuluy diteundeun di Kemah Suci hareupeun Peti Perjangjian.
8Poe isukna sasumpingna ka Kemah, katingali iteuk Harun anu ngawakilan urang Lewi teh sirungan, pucukan, kembangan, malah buahan geus arasak, kanari!
9Ku Musa ditembongkeun kabeh ka urang Israil. Sanggeus katarenjoeun kitu kajadianana, iteuk teh dicarokot deui ku nu bogana masing-masing.
10Ti dinya PANGERAN ngandika ka Musa, "Iteuk Harun teundeun deui hareupeun Peti Perjangjian, pikeun jadi peringetan ka jelema-jelema anu daroraka yen teu meunang gegelendeng deui bisi tariwas."
11Eta timbalan PANGERAN ku Musa dijalankeun.
12Ti dinya urang Israil arunjukan ka Musa, "Upami kitu mah tiwas atuh abdi-abdi teh!
13Asal deukeut-deukeut ka Kemah Suci, saha bae oge moal teu tiwas. Sami bae sareng parantos tiwas ieu mah!"