Dual Panel1Aya deui pangandika PANGERAN ka Musa.
2Musa kudu ngembarkeun ka urang Israil, yen lamun aya anu boga dosa lantaran ngalanggar cegahan PANGERAN teu kahaja, kudu nekanan ieu aturan.
3Upama anu boga dosa teh Imam Agung, anu geus tangtu mawa ka sakumna rayat, manehna kudu ngurbankeun sapi jalu ngora anu mulus ka PANGERAN, pikeun nebus dosana.
4Jogokeun sapina di hareupeun lawang Kemah Tepangan, tumpangkeun leungeun kana sirah eta sapi, peuncit sapina di dinya payuneun PANGERAN.
5Imam Agung kudu nyokot getihna saeutik bawa asup ka jero Kemah.
6Anclomkeun ramona kana eta getih, kepret-kepret getihna tujuh kali ka hareupeun lalangse suci.
7Sawareh deui oles-oles kana juru tatandukan pangukusan di eta Kemah. Getih sesana bahekeun kana dasar liang altar anu di lawang Kemah, pikeun kurban beuleuman.
8Sapi teh ala kabeh gajihna, gajih anu ngabulen eusi beuteung,
9giginjel duanana jeung gajihna, jeung babagian ati anu pangalusna.
10Gajihna beuleum ku imam dina altar, kurbankeun sakumaha halna gajih sato kurban-panarima.
11Ari kulitna, kabeh dagingna, sirahna, sukuna, jeroanana, peujit jeung eusina,
12bawa ka luareun pasanggrahan ka tempat beberesih, nya eta tempat miceun lebu, beuleum di dinya make suluh.
13Upama anu dosana sakumna bangsa Israil, sarta jadi kasalahan anu ngalanggar cegahan PANGERAN ngan teu kahaja,
14ti barang eta dosa kanyahoan, jalma kabeh kudu nyokot sapi keur kurban pamupus dosa. Bawa sapina ku maranehna ka hareupeun Kemah Tepangan.
15Para kokolot kudu narumpangkeun leungeun kana sirah eta sapi, tuluy peuncit sapina di dinya.
16Getihna sawareh kudu dibawa ku Imam Agung ka jero Kemah Tepangan,
17celupkeun ramona kana eta getih, tuluy kepret-kepret ka hareupeun lalangse tujuh kali.
18Sawareh deui ku Imam Agung kudu dioles-oles kana juru tatandukan altar pangukusan di eta Kemah. Getih sesana bahekeun kana dasar liang altar anu di lawang Kemah, pikeun kurban beuleuman.
19Gajihna kabeh kudu dibeuleum dina altar.
20Prakprakanana sakumaha halna ngurbankeun sapi jalu pikeun kurban pamupus dosa. Ku jalan kitu rahayat sakumna dipangurbankeun ku imam tangtu dosana dihampura.
21Awak sapina bawa ka luareun pasanggrahan tuluy beuleum sakumaha kurban pikeun nebus dosa imam. Kitu carana kurban pikeun nebus dosa sakumna rayat.
22Upama anu boga dosa teh gegeden, teu kahaja ngalanggar salah sarupa cegahan PANGERAN,
23ti barang ngarasa yen boga dosa, eta gegeden kudu buru-buru nyokot embe jalu anu mulus keur kurban.
24Eta gegeden kudu numpangkeun leungeun kana sirah eta embe, tuluy embena peuncit gigireun altar beulah kaler, paranti meuncit kurban beuleuman. Eta teh kurban pamupus dosa.
25Imam kudu nyelupkeun ramo kana getih eta embe, tuluy getihna oles-oles kana tatandukan altar. Getih sesana bahekeun kana dasar liang altar.
26Kabeh gajihna ku imam kudu dibeuleum dina altar sakumaha gajih sato kurban panarima. Ku jalan kitu eta gegeden teh ku eta imam dipangnyieunkeun kurban pikeun nebus dosana, tangtu dihampura.
27Upama anu boga dosana rayat biasa, teu kahaja ngalanggar salah sarupa cegahan PANGERAN,
28ti barang dibejaan yen salah kudu ngahaturkeun embe bikang anu mulus.
29Tumpangkeun leungeun kana huluna, peuncit gigireun altar sisi kaler paranti meuncit sato kurban beuleuman.
30Imam kudu nyelupkeun ramo kana eta getih embe, oles-oles kana juru tatandukan altar. Getih sesana bahekeun kana dasar liang altar.
31Gajihna kabeh ala sakumaha sato anu dijieun kurban panarima, tuluy beuleum dina altar, seungitna bakal katampi ku PANGERAN. Ku jalan kitu eta jelema teh ku imam dipangnyieunkeun kurban dosa, tangtu dihampura.
32Upama sato kurban pamupus dosa teh domba, kudu nu bikang jeung mulus.
33Tumpangkeun leungeun kana sirah eta domba, peuncit dombana di gigireun altar beulah kaler paranti meuncit kurban beuleuman.
34Imam kudu nyelupkeun ramona kana getih eta domba, tuluy oles-oles kana juru tatandukan altar. Getih sesana bahekeun kana dasar liang altar.
35Gajihna ala kabeh sakumaha gajih domba keur kurban panarima, tuluy beuleum hijikeun jeung kurban kadaharan haturan PANGERAN. Ku jalan kitu eta jelema ku imam dipangnyieunkeun kurban dosa, tangtu dihampura.