Dual Panel1Yakub geus ngadangu yen di Mesir loba gandum. Seug nyaur pala putra, sarta saurna, "Ulah jarongjon bae, ku naon teu alihtiar?
2Bejana di Mesir loba gandum. Cik ka daritu meuli, supaya urang ulah nepi ka paraeh ku kalaparan."
3Bral sapuluh saderek-saderek Yusup arindit ka Mesir rek mareuli gandum.
4Tapi Binyamin, rayi tegesna Yusup mah teu dibikeun milu, sieun kuma onam.
5Pala putra Yakub geus carunduk ka Mesir, bareng jeung abrulan sejen-sejenna nu pada arek ngaruyang, sabab sakuliah Kanaan oge katarajang paceklik.
6Yusup, anu mangkon kawasa di satanah Mesir, ngicalna gandum ka unggal bangsa bae. Saderek-saderekna geus aya di payuneunana, sararujud ka anjeunna.
7Barang gok ge Yusup teh jol-jol wawuh bae, tapi teu nyirikeun anjeun. Pok mariksa bengis pisan, saurna, "Maraneh nu ti mana?" Wangsulanana, "Sumuhun ti Kanaan, sumeja ngiring meser tedaeun."
8Maranehna mah kalinglap, teu saperti Yusup ka maranehna.
9Ras Yusup emut ka nu kaimpenkeun ngeunaan maranehna. Pok ngalahir deui, "Maraneh mata-mata rek ngintip kalemahan nagara kami."
10Wangsulanana, "Sanes, Gusti! Pang dongkap teh sumeja meser tedaeun bae.
11Abdi Gusti sadayana padudulur. Sadayana jalmi-jalmi jujur, sanes pisan mata-mata."
12Waler Yusup, "Ah puguh maraneh teh arek ngintip melengna nagara kami!"
13Piunjuk maranehna, "Gusti, abdi-abdi teh sadayana mah dua belas, tunggal sabapa, di tanah Kanaan. Anu bungsu dikantun di lembur sareng pun bapa, dupi anu hiji deui parantos tilar dunya."
14Waler Yusup, "Geus! Ceuk kami tadi, maraneh mata-mata!
15Pangakuan maraneh rek diuji. Demi asmaning raja Mesir, kami sumpah: Maraneh moal dileupaskeun, upama dulur maraneh anu bungsu teu didatangkeun ka kami.
16Meunang balik saurang, sina nyokot eta adi, bawa ka dieu. Nu sejen-sejenna ditahan, rek dijaga masing keras, ngadago bukti omongan maraneh. Upama teu bukti, demi jayaning raja, tetela maraneh mata-mata."
17Tutas sasauran kitu, geblus saderek-saderekna diasupkeun ka jero panjara, meunang tilu poe.
18Dina katilu poena anjeunna sumping, saurna, "Kami teh nyembah ka Allah. Nu matak, mun maraneh hayang lila hirup kudu kieu:
19Buktikeun kajujuran. Maraneh meunang balik, meunang mareuli gandum keur dahareun sakulawarga anu keur kalaparan. Tapi saurang tetep di tahan di dieu.
20Maraneh kudu daratang deui mawa dulur anu bungsu, geusan bukti benerna pangakuan maraneh, sangkan kami ulah nepi ka maehan maraneh." Saderek-saderekna kapaksa ngiringan.
21Ti dinya seug ngaromong pada dulur, "Enya, talajak urang bareto ka Yusup teh telenges pisan, teu tolih kumaha nalangsana hatena basa menta dipikarunya. Ayeuna karasa wawalesna."
22Ceuk Rubin, "Nu matak ceuk Akang ge bareto, ulah dikaniaya eta budak teh. Tapi maraneh teu ngagarugu. Ayeuna urang kudu naur wawales patina."
23Teu nyarahoeun yen sagala caritaanana kahartos ku Yusup, kawantu ari miunjuk ka anjeunna teh make juru basa.
24Yusup ngajengkat ka nu singkur, ngadon nangis heula. Sanggeus leler kakara nemonan deui, ceg bae nyepeng ka Simeon. Red Simeon dibarogod hareupeun dulur-dulurna.
25Sanggeus kitu Yusup miwarangan supaya karung-karung maranehna diareusian. Ari duit pameulianana kudu diasupkeun kana karung masing-masing, jeung dipiwarang dibekelan dahareun keur di jalan. Prak dilalampahkeun.
26Geus kitu bral saderek-saderekna marulang marawa gandum beunang meuli, dimuatkeun kana kalde.
27Ari nepi ka panganjrekan, aya nu muka karung bawana rek maraban kalde. Ana gorehel bet aya duitan.
28Atuh hariweusweus ka dulur-dulurna, pokna, "Ieu duit kuring mah bet dipulangkeun, aya di jero karung!" Atuh mani ngararenjag bari silih tenjo beungeut dibarung ku keketegan. Aromongna, "Ya Allah, bade dikumahakeun abdi-abdi teh?"
29Sanggeus cunduk ka Kanaan puk-pok nyaritakeun pangalaman ka ramana,
30"Nu nyepeng kawasa di ditu teh mariksana bengis pisan, malah nuding yen abdi sadaya mata-mata nu keur ngintip nagarana.
31Nya teras unjukan deui, ‘Abdi-abdi jalmi jujur, sanes mata-mata.
32Abdi-abdi sadayana mah dua belas padudulur tunggal sabapa. Nu hiji parantos tilar dunya, nu hiji deui dikantun sareng pun bapa.’
33Tapi saurna teh, ‘Hal eta ku kami rek diuji, enya henteuna maraneh jelema jujur. Dulur maraneh ku kami rek ditahan saurang, sesana meunang baralik mawa gandum, dahareun maraneh sakulawarga anu eukeur kalaparan.
34Kudu daratang deui ka kami, bawa eta dulur anu bungsu. Mun geus bukti, kakara kami percaya yen maraneh jujur, lain mata-mata. Mun kitu heug, maraneh meunang nyorang ieu nagara, sarta dulur maneh nu ditahan dibikeun deui.’"
35Ti dinya karung-karung dibarukaan rek dibudalkeun. Ana gorehel dina karung masing-masing aya duitan. Sarerea, kitu deui ramana mani sarepa.
36Pok ramana sasauran, "Ari maraneh bet nyieun-nyieun sangkan Ama kaleungitan anak. Yusup geus euweuh di kieuna. Simeon ditahan. Ayeuna Binyamin arek dibawa! Ama anu kudu kaleleban!"
37Pok Rubin mihatur ka ramana, "Saupami Binyamin teu kabantun wangsul deui, anak abdi lalaki anu dua paehan ku Ama. Sing percanten, Binyamin tangtos kabantun deui wangsul."
38Waler Yakub, "Ulah, anak kami anu ieu mah moal dibikeun. Lanceukna geus ajal, kari ieu anak kami teh. Kumaha mun cilaka di jalan nepi ka hanteuna. Kami geus sakieu kolotna, hamo kuat nandangan prihatin balukar ti maraneh. Paeh kami teh kitu-kitu teuing mah!"