Alkitab Mobile SABDA
[VER] : [SUNDA]     [PL]  [PB] 
 <<  Keluaran 14 >> 

1Geus kitu PANGERAN nimbalan ka Musa,

2"Parentahkeun ka urang Israil sina maralik deui, tuluy masanggrahan di Pi Hahirot, antara Migdol jeung Laut Beureum palebah Baal Sepon.

3Raja bakal nyangka urang Israil kapaider di luareun nagara kakurung ku tanah gurun.

4Eta raja ku Kami rek disina terus ngaberung, tangtu ngudag ka dieu. Eta raja sawadya baladna ku Kami rek diserenkeun geusan jadi kamulyaan Kami. Urang Mesir kudu nyaho yen Kami teh PANGERAN." Seug urang Israil maralik deui.

5Ari raja Mesir sapara mantri sanggeus diuningaan yen urang Israil geus budal, ngadadak rarobah deui pikiranana. Pokna, "Naha urang teh bet ngantep bae urang Israil kalabur. Atuh urang ayeuna mah geus teu boga jalma badega!"

6Raja gancang natakeun kareta perang jeung wadya balad.

7Raja Mesir kaluar jeung sakabeh kareta perangna, malah aya genep ratus kareta anu panghadena katut reujeung para senapatina.

8Eta raja ku PANGERAN disina ngaberung, semprung ngudag ka urang Israil anu geus unggul bisa ucul tina genggemanana.

9Wadya balad Mesir lengkep jeung pasukan serdadu kuda jeung pasukan kareta tingsalebrut ngobrot urang Israil anu harita keur masanggrahan di sisi Laut Beureum deukeut Pi Hahirot jeung Baal Sepon.

10Barang urang Israil nyarahoeun keur diudag ku raja Mesir sabalad-balad, kacida sarieuneunana. Tuluy tingjarerit marenta tulung ka PANGERAN.

11Seug ngaromong ka Musa, "Na di Mesir teh parantos teu aya tanah jang kuburan? Kuring dibantun ka dieu teh sina tariwas di gurun keusik? Bet kieu geuning jadina dikaluarkeun ti Mesir teh!

12Sanes parantos disanggemkeun ti samemehna ge ka Bapa yen tangtos kieu temahna? Pan ceuk kuring oge tadina keun bae kuring teh antep di Mesir, teu nanaon jadi jelema budak oge. Nya mending jadi jalma budak tinimbang kudu tiwas di gurun mah."

13Waler Musa, "Tong sarieun, sing taleger. Tenjokeun engke kumaha PANGERAN ngarahayukeun maraneh poe ieu. Eta urang Mesir teh ku maraneh moal katenjo-tenjo deui.

14PANGERAN bakal mangmerangankeun maraneh. Maraneh mah teu kudu naon-naon."

15PANGERAN nimbalan ka Musa, "Ku naon maneh sasambat bae? Urang Israil parentahkeun sina terus kebat.

16Ungkulkeun iteuk maneh ka luhureun laut. Cai laut bakal beulah ngenca ngatuhu. Pudunkeun urang Israil sina mareuntas di nu tuhur.

17Ari urang Mesir ku Kami rek disina ngaberung, sina ngarudag ti tukang. Raja Mesir sabalad-balad katut pasukan kareta jeung pasukan serdadu kudana ku kami rek dielehkeun di dieu, pikeun kamulyaan Kami.

18Geus kitu kakara eta urang Mesir teh bakal nyaraho yen Kami teh PANGERAN."

19Geus kitu Malaikat Allah anu tadina aya di hareupeun pasukan Israil pindah ka beulah tukang. Tihang mega tea oge pindah jadi aya di tengah-tengah,

20antara pasukan urang Mesir jeung pasukan urang Israil. Ari megana ka urang Mesir matak poek, ka urang Israil tetep caang, jadi eta dua pasukan teh sapeuting jeput teu bisa padeukeut.

21Musa ngungkulkeun iteukna ka luhureun laut, hiuk PANGERAN ngadatangkeun angin ti wetan kacida rongkahna, siak cai laut miak. Angin terus ngagelebug sapeupeuting, datang ka cai laut teh miak nepi ka dasarna, caina jadi dua bagian.

22Urang Israil marudun nyorang dasar laut anu geus tuus, kenca katuhueunana cai ngadingding.

23Urang Mesir oge tuturubun ka dinya, ngudag pandeurieunana jeung pasukan kudana, pasukan karetana katut kusir-kusirna.

24Barang geus meh janari, PANGERAN nyoreang ka balad Mesir tina tihang seuneu jeung tihang mega, seug balad Mesir teh ku Mantenna digujrudkeun.

25Kikiping kareta-karetana mararacet nepi ka meh teu bisa laju. Ceuk urang Mesir, "Gancang urang ngejat! Urang dilawan ku PANGERAN anu mangmerangankeun urang Israil!"

26PANGERAN nimbalan ka Musa, "Ungkulkeun deui iteuk maneh ka laut, caina bakal liput ngalingkup deui, ngarungkup urang Mesir katut kareta jeung jelema-jelemana."

27Musa ngungkulkeun deui iteukna ka luhureun laut, sarta wanci rek bray isuk cai laut geus liput deui sabiasana. Urang Mesir pahibut arek buru-buru ngarejat ti jero cai, tapi kabeh ku PANGERAN dilelepkeun di laut.

28Cai laut liput deui. Kareta-kareta, nu tarumpakna, sawadya balad Mesir anu ngudag ka urang Israil kabeh tiwas diteureuy ku laut, taya anu kaiwalkeun.

29Teu cara urang Israil anu tumaninah nyorang dasar laut, dihapit ku cai anu ngadingding kenca katuhu.

30Poe eta PANGERAN ngarahayukeun urang Israil tina ancaman urang Mesir, anu geus kari bangkena bae ngalalumbuk di basisir, katarenjoeun ku urang Israil.

31Sanggeus nyarahoeun kana kadigjayaan PANGERAN numpes urang Mesir, urang Israil jadi mikasieun ka PANGERAN, sarta palercayaeun ka Mantenna kitu deui ka Musa, abdi-Na.


  Share Facebook  |  Share Twitter

 <<  Keluaran 14 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel