Alkitab Mobile SABDA
[VER] : [SUNDA]     [PL]  [PB] 
 <<  Yosua 3 >> 

1Isukna rebun-rebun keneh Yosua katut bangsa Israil geus arindit ti Sitim muru ka Walungan Yordan, tuluy mareuting heula di dinya memeh mareuntas.

2Sanggeus meunang tilu poe, para pamingpin ngideran pakemahan,

3bari marentah kieu ka jalma-jalma, "Lamun geus aya imam-imam anu ngagotong Peti Perjangjian PANGERAN Allah maraneh, buru-buru taluturkeun, tinggalkeun ieu pakemahan.

4Maraneh can kungsi ka dieu, jadi nya aranjeunna nu jadi tuduh jalanna. Tapi ulah darareukeut kana Peti Perjangjian, kudu anggang kira-kira sakilometer."

5Yosua marentah kieu ka jalma-jalma, "Maraneh kudu susuci, sabab isukan PANGERAN bakal mintonkeun mujijat-mujijat."

6Ari para imam diparentah arangkat ti heula bari ngagotong Peti Perjangjian. Seug dilalampahkeun.

7Ngandika PANGERAN ka Yosua, "Nu rek dipigawe ku Kami poe ieu, baris ngalantarankeun maneh dihormat-hormat sarta diagungkeun ku urang Israil, sarta ku maranehna baris katangen yen maneh disarengan ku Kami cara Musa.

8Parentahkeun ka imam-imam anu ngagotong Peti Perjangjian, yen lamun geus narepi ka sisi Walungan Yordan kudu ancrub tuluy ngarandeg heula deukeut sisina."

9Geus kitu saur Yosua ka jalma-jalma, "Ka darieu kumpul. Darengekeun pangandika PANGERAN Allah maraneh.

10Engke maraneh bakal nyaraho yen Mantenna tan wande nyingkahkeun urang Kanaan, urang Het, urang Hiwi, urang Pares, urang Girgas, urang Emor jeung urang Yebus. Maraneh baris nyararaho yen disarengan ku Allah anu jumeneng,

11samangsa Peti Perjangjian PANGERAN Gustining sajagat dibawa meuntasan Walungan Yordan heulaeun maraneh.

12Ayeuna pilih dua belas jelema ti saban kaom Israil saurang-saurang.

13Di mana para imam anu ngagotong Peti Perjangjian PANGERAN Gustining sajagat geus ngancrubkeun sukuna kana cai, Walungan Yordan moal bisa ngocor, ti beulah girang caina mendet jadi beungkak ngabadeden teu bisa laju."

14(3:14-15) Harita teh keur usum dibuat, sarta eta walungan keur caah. Seug jalma-jalma teh arindit ti pakemahan rek mareuntas ka Walungan Yordan, para imam sina ti heula ngagotong Peti Perjangjian. Barang crub para imam alancrub,

15(3:14)

16eta walungan mendet, teu bisa ngocor, ngabadeden terus beungkak ka girang jauh pisan nepi ka kota Adam, hiji kota gigireun kota Sartan. Nu di hilir jadi kapenggel sama sakali, terus ngocorna ka Laut Paeh; ku hal eta jalma-jalma teh bararisa meuntas ka deukeut kota Yeriho.

17Sabot jelema-jelema mareuntas di nu saat, imam-imam anu ngagotong Peti Perjangjian tea ngararandeg di nu saat di tengah-tengah Walungan Yordan, nepi ka jalma-jalma mareuntas kabeh.


  Share Facebook  |  Share Twitter

 <<  Yosua 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel