Alkitab Mobile SABDA
[VER] : [TAA]     [PL]  [PB] 
 <<  1 Timotius 5 >> 

1Wali ane tau to langkai to tu’amo mangika sala, ne’e makasar nuika manganseko ia, pei paposiaka ia ewa wimba nuika magombo mampaposiaka pa’amu see ia tamo damangika wo’u sala to etu. Pasi ane to langkai to mangurawa, patiendoka sira ewa nuika mampatiendoka a’imu to langkai.

2Panewa to we’a to tu’amo, patiendoka sira ewa wimba nuika mampatiendoka indomu. Pasi ane to we’a to mangurawa, patiendoka sira ewa nuika mampatiendoka a’imu to we’a, pei jagai lengkomu pasi pampobuukamu resi tau we’a to mangurawa etu see singkonong pei i Pue Allah.

3Wali mangkonong tau balu to we’a, ewa si’i raika. Pakabae pasi piara kojo tau balu to taa kojo re’e tau to mampiara ia.

4Pei ane tau balu to re’e ananya bara makumpunya to maya mampiara ia, to tao-tao sira semo mampiara ia, apa etu semo songka i mPue Allah resi tau. Pasi ane tau mampongakung mampiara tau tu’anya pasi buenya ewa naika nsira mampiara ia tempo ia dakodiwa, etu semo palaong to masipato raika pasi i Pue Allah masanang kojo mangkita palaong to etu.

5Pei ane tau balu to taa kojo re’e tau to mampiara ia, tau balu etu jamo mansarumaka kojo i Pue Allah. Pasi ia madota kojo wuri eo makai-kai resi i Pue Allah marapi sawang resi Ia.

6Pei tau balu to ojo mangalulu pamporani ndayanya, tau etu nempo koronya tuwu, kamonsonya ia ewa tau to matemo apa katuwunya etu tare batuanginya.

7Wali to’oka porenta si’i resi tau to mangaya nja’u ria. Apa ane sira mangalulu porenta si’i, tare tau to maya mampakasala sira.

8Pei ane re’e tau to taa mampiara tau balu to masipato ia semo mampiara, taa manto’o ane tau to maroo ri banuanya, tau etu ojo mamposapuka pangayanya. Tau etu to ja’a-ja’a lengkonya pei tau to taa mangaya.

9Wali kita mampakanasaka ruyu mangkonong to imba tau balu to we’a to danapiara ntau i mPue Allah. Tau balu etu taa maya ane ia tau to tawa rata ono mpuyu nto’u umurnya, pasi taa seja maya ane tempo seore ia yabi sangkani marongo.

10Pasi tau to napiara ntau i mPue Allah etu, ia tau to ane ri pangkita ntau boros ia madota mangika palaong to matao. Etu semo ia madota mampiara ananya tempo seore, ia madota mampalinggona tau to rata, ia madota mangansawang tau to i Pue Allah Puenya, rapanya mamposo’i yau awu ntana yako ri witi nsira, pasi ia madota seja mangansawang tau to mangarata kasusa. Pasi samparia ngaya mpalaong to matao ia madota mangika. Wali tau balu to ewa wetu lengkonya, tau etu masipato napiara ntau i mPue Allah.

11Pei ne’e tau i mPue Allah etu mampiara tau balu to damangurawa. Apa tau balu to mangurawa ane rata temponya sira mamporoe to langkai, panewa sira rani marongo. Wali ane ewa see, sira tamo rani mangika palaong to sira roomo mamparajanjika i Kerisitu sira damangika, see naka sira damangepe sala.

12(5:11)

13Pasi tau balu to mangurawa, ane sira napiara ntau i mPue Allah, sira damawali meyoko pasi sira ojo damalinja-linja njo’u banua ntau. Pei si’a ojo etu to damawali resi sira, sira damawali seja tau to bawiwi pasi to sangkani rani manganto’oka sa’e ewa wimba danaika palaong to si sira, pasi to mangansarita anu to taa matao rasarita.

14Wali ane tau balu to mangurawa, aku rani sira marongo pei riana pasi mampasilonga palaong ri banuanya. Apa ane ewa see naika nsira, sira taa damangika palaong to damangawaika bali ngkita jaya manganto’o maja’a kita.

15Apa re’e sawei mba’a tau balu to room mangandolika tangonya yako resi i Pue Allah pei mangalulu yau i Kepala Measa.

16Wali tau to mangaya ane re’e ja’inya to we’a to mate yau rongonya, to tao-tao ia semo mangansawang tau balu etu naka ne’e mampakabeu tau i mPue Allah. Apa ane ewa see tau i mPue Allah nakoto mangansawang tau balu to taa kojo re’e tau to mampiara.

17Wali re’e wo’u to aku manganto’oka korom mangkonong ketua-ketua ntau to mangaya. Etu semo mangkonong ketua-ketua to matao kojo naika mampasilonga tau to mangaya, taa manto’o ketua-ketua to madota mampakarebaka pasi mampotundeka tuntu i mPue Allah. Wali ketua-ketua to ewa wetu sira danato’o ntau masipato mangantima ntanapa to dua ngkani kabaenya ewa to biasa.

18Apa ri raya ntuntu i mPue Allah re’e ratulis, “Ane sapi to mangayojok pae naka wea, ne’e raso’o yau ngujunya see ia maya mangkoni pae to rayojok etu.” Pasi tuntu i mPue manganto’o wo’u, “Tau to mapalaong masipato mangantima saronya.”

19Wali si’i wo’u kuto’oka korom mangkonong ketua-ketua ntau to mangaya. Ane bara re’e tau manganto’o gombo to mampakasala ketua, ne’e rapadongeka ane taa gana dua bara togo tau to matamanasa salanya etu.

20Pei ane re’e ketua etu to sangkani mangika dosa, seko tau etu ri tango ntau i mPue Allah, see tau to mangandonge etu damawali meka raya nsira mangika dosa to naika ngketua etu.

21Wali aku mamporapika resi i Pue Allah pasi i Kerisitu Yesu pasi pomakau i mPue Allah to ipilisiNya see sira mawali matamanasa mangkonong paposia to kuto’oka korom si’i. Paposia etu manganto’o lulu kojo porenta to aku room manganto’oka korom etu. Pasi tempo korom mangabotus palaong to mawali, ne’e mangampilis tau.

22Wali mangkonong tempo mangokotaka tau mawali ketua ntau to mangaya, ne’e masara mangokotaka ia. Apa ane ia bara re’e dosa to korom taa mangansani, ane ewa see, tempo korom mangokotaka tau etu sewaju ewa korom singkonong pei dosa ntau etu. Wali jagai kojo lengkomu pasi pampobuukamu naka ne’e mangika palaong to taa masipato raika.

23Pasi re’e wo’u paposiangku resi korom, etu semo ne’emo manginu ojo ue. Inu seja tule anggur sangkodi see matao muni kompomu, apa aku re’e mangandonge korom mandudu ngkani masaki.

24Wali ane mangkonong dosa ntau, re’e dosa to miyala kojo, wali tawa rata temponya rabotus nansani ntau boros dosa ntau etu. Pei re’e wo’u dosa ntau to taa miyala kojo. Tempo to darata panewa danansani ntau boros.

25Pasi ewa see seja ane palaong to matao. Re’e to miyala kojo, pei nempo taa miyala kojo palaong to matao, taa masae danansani ntau boros.


  Share Facebook  |  Share Twitter

Download Audio MP3 (1 Timotius 5):
Mobile (Low Quality) - CD (High Quality)

 <<  1 Timotius 5 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel