Alkitab Mobile SABDA
[VER] : [TAA]     [PL]  [PB] 
 <<  2 Petrus 1 >> 

1Sura si’i yako resi aku, i Simon Petrus. Aku to papolaong i Yesu Kerisitu pasi pomakauNya seja. Wali aku mangantulisika komi to yunu mami to mangaya seja anu to monso mangkonong i Yesu Kerisitu. I Yesu Kerisitu, Ia semo Allah ngkita pasi to Pansompo ngkita. Pasi Ia sangkani mangika anu to singkonong pei i Pue Allah. Wali see naka kita mangaya Ia. Pasi pangaya ngkomi resi Ia etu sewaju ewa pangaya mami to bae kojo batuanginya resi kami.

2Wali aku makai-kai resi i Pue Allah see kanjo’u-njo’u tiduga-dugang Ia mampaponsanika komi kanotoNya. Pasi aku makai-kai see Ia mangawaika komi karodo ndaya apa saba komi masinsani pei Ia, pasi masinsani seja pei i Yesu, Pue ngkita.

3Wali i Pue Allah bae kojo kuasaNya apa Ia semo i Allah. Wali yako kuasaNya etu Ia roomo mangawaika resi kita samparia to danapake ngkita ri raya ngkatuwunta. Pasi Ia room mangawaika resi kita samparia to danapake ngkita see kita takoto mangika lengko ngkatuwu to mampakasanang Ia. Wali maka pei i Pue Allah mangawaika kita samparia etu? Ia mangawaika samparia to etu apa kita masinsani pei Ia to roomo mampokio kita. Pasi naka pei Ia nampokio kita see kita damangarata seja santila yako ri kayawaNya pasi ri kataoNya.

4Wali yako kayawaNya pasi kataoNya etu see naka Ia nangawaika resi kita parajanji-parajanji to bae kojo batuanginya pasi to ipu raya ngkita mampobuuka. Wali apa saba komi mangaya parajanji to etu, see naka lengko ngkomi pasi pampobuuka ngkomi mawali ewa lengko pasi pampobuuka i mPue Allah. Pasi apa saba komi mangaya parajanji etu, see naka komi ralapa yako ri ara ngkuasa mpamporani ndaya to maja’a. Wali matao kita ralapa yako ri kuasa mpamporani ndaya to maja’a etu, apa pamporani ndaya etu ojo mampakaja’a katuwu ntau ri lino si’i. Wali gete, magaya kojo parajanjiparajanji etu!

5Wali saba i Pue Allah roomo mangawaika komi samparia parajanji to etu, see naka masipato komi si’a ojo mangaya Ia. Masipato komi seja mangika lengko to matao. Pasi ri rayanya mangika lengko to matao etu, matao radugangika wo’u kanasanya resi komi mangkonong songka i mPue Allah.

6Pasi ri rayanya mangadugangika kanasanya resi komi, dugangika wo’u karoso ndaya see maya manta’amaka raya ngkomi re’e palaong to maja’a. Pasi ri rayanya komi manta’amaka raya ngkomi etu, dugangika wo’u kasabara ngkomi. Pasi ri rayanya komi mangansabara, dugangika wo’u lengko to mampakasanang i Pue Allah.

7Pasi ri rayanya komi mangika lengko to mampakasanang i Pue Allah etu, dugangika wo’u pamporayang ngkomi resi pua’i to samba’a pangaya. Pasi ri rayanya mangamporayang pua’i to samba’a pangaya, dugangika wo’u pamporayang ngkomi resi samparia tau.

8Apa ane lengko to etu to nuika ngkomi, pasi ane kanjo’u-njo’u tiduga-dugang resi komi mangika lengko to etu, ane ewa see katuwu ngkomi damawali bae batuanginya pasi bae wua mpalaong ngkomi. Wali ane komi mangika lengko to ewa wetu, kanjo’u-njo’u tiduga-dugang komi mangansani i Yesu Kerisitu, Pue ngkita.

9Pei ane re’e tau to tare lengkonya to ewa wetu, sira ewa tau to buta, to taa maya mangkita anu to longko. Pasi sira re’e mangkalingan i Pue Allah roomo mampalasi yau dosa to naika nsira tempo ruyu.

10Wali a’i-a’ingku, ne’e ewa wetu. I Pue Allah roomo mampokio komi pasi mangampilis komi. Wali see naka pakakoro mangika lengko to aku roomo manganto’o etu apa etu semo to masipato naika ntau to roomo napokio pasi napilis i mPue Allah. Wali ika lengko to ewa wetu apa ane ewa see komi taa damampiyaika yau pangaya ngkomi.

11Pasi ane komi mangika lengko to ewa wetu, bae kojo ntanapa to danawaika i mPue Allah komi tempo i Yesu Kerisitu, Pue ngkita pasi to Pansompo ngkita damawali Makole rataka ri singkasaenya.

12Wali see naka aku taa damandoo mampatiendoka komi mangkonong anu to aku roomo manganto’oka komi etu. Kamonsonya komi manasamo pasi maroso kojo pangaya ngkomi resi anu to monso to roomo rapotundeka resi komi. Pei aku tiroo damampatiendoka komi mangkonong anu to etu.

13Apa ane ewa pampobuuka to si aku, ane korongku si’i tiroo tuwu, masipato aku mampatiendoka komi see mampakakoro raya ngkomi damangaluluka anu to roomo rapotundeka resi komi etu.

14Apa aku kunsani aku tamo masae damampiyaika yau korongku si’i. Naka pei aku mangansani, apa i Yesu Kerisitu, Pue ngkita, roomo mampaponsanika aku.

15Wali see naka aku madota kojo mangantulisika komi sura si’i mangkonong anu to etu see nempo aku roomo mate yau, tiroowa re’e sura si’i damampatiendoka komi mangkonong anu to roomo rapotundeka resi komi etu.

16Wali a’i-a’i, aku rani kojo komi mampobuuka anu to paponsanika mami komi seore, apa anu to to’o mami etu monso pu’u. Wali anu to kami mampaponsanika komi seore etu, mangkonong kuasa i Yesu Kerisitu, Pue ngkita, pasi mangkonong temponya Ia dama’i wo’u. Pei tempo kami mampaponsanika komi etu, kami taa mangampake sarita-sarita to taa monso to naika ntau to pande. Kami mangansaritaka komi mangkonong palaong to nakita nu mata mami seore. Apa kami semo matamanasa mangkonong kuasa i Yesu Kerisitu. Kuasa etu bae kojo kayawanya.

17Apa kami re’e siwaka pei Ia seore tempo i Pue Allah, Pa’a, manga’angga Ia pasi mampakayawa Ia. Tempo etu Ia mangandonge loo to yako resi i Pue Allah to bae kojo kayawaNya. Loo etu manganto’o, “Si’i semo AnangKu to Kuporayang kojo. Aku masanang kojo resi Ia.”

18Wali kami semo to mangandonge seja loo to yako ndate saruga etu tempo kami sindara-ndara pei i Yesu Kerisitu ndate rapa ntongku to napilis i mPue Allah.

19Wali a’i-a’i, samparia palaong to etu paka nato’o yami nto pantuntu tuntu i mPue Allah tempo owi. Wali tempo kami mangkita palaong etu mawali, maroso wo’u pangaya mami ri gombo nto pantuntu tuntu i mPue Allah etu. Pasi matao ane komi seja mangangkongko anu to nato’o nsira etu. Apa gombo nsira raporapaka ewa pansona to mangansindo tampa to mawuri sampe rata temponya mosueo, temponya kita nasindo wo’u nu batu’e ngkeo. Wali batuanginya batu’e ngkeo etu, etu semo i Yesu Kerisitu. Ia semo to raporapaka ewa batu’e ngkeo etu apa Ia dama’i wo’u damampakareme raya ngkita see kita damangansani samparia.

20Pei ane mangkonong to pantuntu tuntu i mPue Allah ne’e kojo mangkalingan, ane gombo nsira to ratulis ri raya ntuntuNya tempo owi, gombo etu tare to ojo yako ri pampobuuka nto pantuntu tuntu etu semo.

21Apa gombo to nato’o nto pantuntu tuntu i mPue Allah tempo owi etu, si’a yako ri pamporani nsira naka pei rato’o. Pei tau etu i Pue Allah Puenya pasi sira nawaika i Nosa Mapasing pampobuuka, see naka sira mamporata gombo i mPue Allah etu. Wali see naka masipato kojo kita mangangkongko anu to nato’o nsira.


  Share Facebook  |  Share Twitter

Download Audio MP3 (2 Petrus 1):
Mobile (Low Quality) - CD (High Quality)

 <<  2 Petrus 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran